Diamars mainta riba LG Smith Blvd un persona cu scooter sin number a dal den un turista na pia. Esaki a sosode net banda di ex oficina di Duana.
E turista tabatin algun minuut canando, ya cu el a baha for di barco y algun 100 meter leu a keda herida den un hit and run. Polis y ambulance a presenta. Nan a tuma tur informacion di e turista.
E scooter no tabata tin number y esey ta haci e situacion un tiki fastioso. Mester bay mira camara di siguridad. Personal di ambulance a atende e turista den ambulance na e sitio mes. El a haya rasca na cara y otro partinan di curpa.
Polis despues a hiba e turista herida y su pareha pa waf unda nan a subi barco bek cu un mal experiencia di Aruba. Un mal experiencia caminda ta dal turista, un ser humano, cu un vehiculo y sigui bay.
