Diaranson mainta, Rocco Tjon, den su calidad di Minister di Husticia, a anuncia un Management Team nobo di Cuerpo di Bombero. Segun e mandatario, esaki ta en bista di e ultimo desaroyonan.
Manera ta conoci, Emilio Geerman tabata e persona cu tabata dirigi Cuerpo di Bombero te cu ultimo aki ainda, pero a mand’e cas tambe.
E mandatario a sigui bisa cu di awo padilanti, Schoop, cu tin amplio experiencia riba tereno di maneho y liderazgo, lo ta na cabes di e Management Team. Alabes, Corea, cu tambe tin amplio experiencia di e organisacion, ya cu el a traha pa un tempo largo den e Cuerpo y por ultimo, Humphrey de Cuba, cu lo sigui forma parti di e team di maneho.
Durante un reunion cu sindicato a toca e puntonan di enfoke cu lo ta prioridad p’e team di maneho. A splica nan tambe di e pasonan cu lo tuma, conhuntamente cu DRH, pa riba termino corto, haya refuerso di algun oficial di Hulanda, pa un tempo largo.
Esaki ta e empleado publico di mas suerte na Aruba. Awendia pa cos chikito ta manda e empleadonan publico cas. Emi Geerman si ta un ambtenaar cu hopi chens y t’ey keto bay. Dialuna a drenta informacion cu tin un auto coriendo hopi malo riba caminda. E tabata den e area di Sasaki direccion Paradera.
A MANDA EMILIO ‘EMI’ GEERMAN CAS
Polis di Santa Cruz a ser pidi pa bay mira e situacion pa topa cu e auto na Paradera. E unidad di Santa Cruz tabata poco leu. Pa ora nan a yega den e area ya Emi Geerman coriendo malo den trafico a drenta e zona di e polisnan di Noord pa bay direccion Moko. A saca polis di Noord pa bay mira si ta topa cu e auto. Banda di Moko a topa e auto. Ta trata di V-2913 cu ta un Hyundai Accent blanco.
E auto ta di Dienst y Cuerpo di Bombero a huur esaki pa Emi Geerman como hefe core. E tin derecho riba auto y dienst auto ta daña. P’esey e ta core cu e V-2913. Polis di Noord cu a haya e melding a bay na Moko y a topa cu e V-2913 y tambe e chauffeur. Net Emi Geerman a yega su cas. Basa riba e yamadanan cu a drenta di e peliger cu e tabata causa riba caminda, polis a detene.
A confirma cu e ta bebi. A pidi transporte policial cu a hib’e warda di Noord. Eynan un subfiscal a atende cu ne y el a keda cera. Den pasado e mesun Emi Geerman tabata polis. El a bira director di KIA y despues a core cu ne. Su forma di trata hende ta hopi malo. Hasta nan tin un otro nomber p’e cu ta Khadafi di tempo cu e tabata den Cuerpo Policial.
Tempo e tabata polis a dal auto burachi caba y core riba tres wiel. A hit and run y polis a detene banda di Kibaima. Te awe e ta ambtenaar keto bay y hasta hefe di Cuerpo di Bombero. E bomberonan ta papia cu casi e no ta traha y hopi biaha ta yega bebi.
Esey ta expresion di e bomberonan cu no ta soporta su manera di atende cu trahado. Asina mes Rocco Tjon tin man riba su cabes. Awo cu a deten’e, lo mira kico lo bay pasa. Un empleado publico cu ta duna un mal imagen asina atrobe no merece di tin un funcion como e hefe di Cuerpo di Bombero na Aruba.
