Un situacion basta desagradabel a sosode na Weng Kee Bar & Restaurant na Santa Cruz na momento cu un muhe a baha di un bus y start un pelea formal y agredi e persona encarga den dicho bar.
Diasabra anochi, den careda di 10:20 pm, polis a presenta pa un caso di agresion na Weng Kee Bar & Restaurant caminda cu un bus, tour bus T-100 color geel, lo mester a presenta cu un grupo di hende, cu a baha y agredi e persona encarga den e bar. Un destruccion basta grandi a tuma luga eyden caminda a kibra basta cos den e luga y causa daño, heridando hende.
Segun testigonan, den e bus tabatin basta hende bou influencia. Den nan un muhe, cu ta esun cu a cuminsa un pelea formal, a pasa man pa un boter y kibra esaki den cabes di e trahado. Un rato despues tur hende a subi e bus y bandona sitio. A duna di conoce cu e chauffeur di e bus aki tambe tabata mustra di ta bou di influencia.
E persona agredi a duna polis descripcion di e muhe, bisti na preto cu a baha y kibra e boter den su cabes, como tambe detaye di kico tur a tuma luga y e agresion cu el a pasa aden. Polis a tuma tur dato y a cuminsa un buskeda. Diferente unidad a cuminsa busca den vecindario pero no a encontra e bus.
