Diasabra anochi un persecusion a caba te den un compleho di apartamento den Bushistraat. Un unidad special di polis di K9 a duna ordo na un chauffeur pa e stop. E no a sigui e ordo di polis. Asina a cuminsa un persecusion. Tin un motibo pakico e manehador no a stop y polis mes a sospecha cu e tin arma riba dje. Refuerso a bin ora cu e persona a yega te den Bushistraat y drenta un apartamento.
Tin basta hende ta biba na e compleho di dos piso. Polisnan a blokia e caya. Djey a pidi refuerso di e team special di aresto. Nan a yega y mesora e persona busca a sali bin afo y entrega su mes. E cos no a caba ey. A transporta e persona pa warda di polis mientras cu a busca e autorizacion pa drenta e apartamento.
Un accion cu un proceso basta larho cu varios unidad envolvi. Mientras cu varios unidad a blokia caya y otronan a rondona e compleho di apartamento, tin cu a bay core ruta pa tog mira si tin algo a ser benta riba caminda. Finalmente e agentenan a drenta e apartamento pa busca e arma cu nan ta sospecha cu e sospechoso cu a huy na prome instante tabata tin. Nan no a topa cu esaki.
