Diasabra ultimo a tuma luga e evento nacional pa WELP di Jungle Splash na e lama di ex-Bushirti hotel, organisa pa Unidad Horde.
Jungle Splash a tuma luga for di 3:30 pm pa 6:00 pm y tabata un evento pa scouting. Joshua Tromp, Program Manager di e evento a splica cu aña pasa debi na e pandemia nan no a logra tene nan actividad, pero e aña aki nan a bin cu e evento aki di Jungle Splash pa mucha entre 8 pa 11 aña di edad. Tur esaki tabata pa e ‘welpen’ por bin hunto riba un dia y cera conoci cu otro, traha un miho union y pasa pret cu otro. Esaki a cubri tur grupo cu ta pertenece na Scouting di Aruba.
Un total di 103 welp di rond Aruba a participa den esaki hunto cu nan lidernan di grupo. Pa loke ta e actividad mes, el a inclui actividad pa tene e muchanan activo y saludabel. Entre otro, a inclui diferente tipo di movecion cu tin di haber cu awa pa representa ‘bevers’ den jungle. Den e parti mas atardi tabatin co’i come y co’i bebe pa tur e muchanan y tambe Brandweer a presenta pa asina refresca e muchanan cu un baño di awa den e solo cayente di Aruba.
Si tin cualkier mayor cu ta interesa pa inscribi nan yiu den scouting na Aruba, nan por subi riba e pagina di Facebook di Scouting Aruba y aki por manda un mensahe direct of por yama na 594 3330 of manda un email pa [email protected] cu cualkier pregunta of peticion di informacion pa inscripcion.
Por ultimo, Tromp a haci un invitacion pa tur mayor of voogd cu kier pa nan yiu tin algo productivo pa haci den weekend, por yama of inscribi nan yiu den scouting. Esaki ta tuma luga tur diasabra y aki e mucha por siña hopi cos manera diferente wega, liderasgo y diferente otro aspecto di bida.
Welpen di Scouting
Welpen, of “Club Scouts” con nan tabata yama originalmente, tabata estableci alrededor di 1914 como grupo di edad p’e fundado di Scouting, Robert Baden-Powell. Baden-Powell a funda e movemento Scout algun aña anterior. Dicho movemento tabata dirigi pa mucha homber di 10 aña bay ariba.
Sinembargo, masha lihe por a tuma nota cu e muchanan mas chikito tambe kier a hunga e wega di exploracion. Pa cautiva e muchanan mas chikito, Baden-Powell a dicidi di uza un historia di fantasia como parti dje actividadnan p’e muchanan aki. El a scoge e ‘junglebook’ di Rudyard Kipling, un coleccion di storia pa mucha publica recien e tempo ey. E storianan tabata, entre otro, tocante e mucha homber Mowgli, cu ta crece den un selva y ta cria pa wolf den un neishi di wolf baby. Mayoria di e gruponan di Scout rond mundo a adopta e grupo di edad y e storia temotico cu tabata compaña esaki.
Awendia, na varios pais esaki no ta mara exclusivamente na mucha homber. Debi cu varios mucha muhe tambe kier a hunga e ‘welpenspel’, Baden-Powell a crea pa nan e grupo di edad ‘brownies’ (kabouter) na 1915, cu un ‘fairytale’ como inspiracion. Asina, awo e mucha muhenan tambe por converti den welp na algun pais. Grupo di welp por consisti di solamente mucha muhe, solamente mucha homber, of un mix di ambos.
