Aruba Tourism Authority den cooperacion estrecho cu entre otro Aruba Airport Authority ta traha continuamente riba oportunidadnan pa ampliacion di vuelonan pa Aruba. Esaki ta principalmente importante durante e temporada actual di crisis.
Entre otro a detecta e oportunidad pa vuelonan for di Inglatera recientemente, despues cu e pais a anuncia cu habitantenan por biaha atrobe. Esfuersonan a resulta den re-introduccion di vuelonan di TUI UK cu lo cuminsa cu vuelonan un bes pa siman non-stop for di Gatwick Inglatera pa Aruba for di 16 di december 2020 te cu en principio 31 di october 2021. Si proyecta e vuelonan na un grado di ocupacion di 70% esaki lo duna un resultado di alrededor 8.400 pasahero pa Aruba durante e temporada menciona.
Den e mercado di Inglatera – mescos cu tur otro mercado unda Aruba ta presente – ta ahusta e manera di mercadea nos producto. Por ripara cu e bishitantenan ta hopi enfoca riba e siguridad di e destinacion y alabes di e rekisitonan cu un destinacion ta exigi prome cu inicia e biahe.
Inglatera no ta un mercado desconoci pa Aruba y entre 2015 pa 2019 a trece un total di 71.360 bishitante pa nos isla.
Cu e reapertura recien di e mercado di Latino America y e vuelonan directo for di Inglatera, cu e status di codigo gel tambe pa e mercado Hulandes, Aruba su turismo poco poco lo sigui florece. E introduccion di vuelonan di Inglatera lo yuda den esaki. Mester menciona si cu for di e mercado Mericano tin e reto di e cantidad di casonan positivo di Covid na e pais cu ta conduci na cancelacionnan of decision di e Mericano di simplemente no biaha. Esaki ta wordo monitorea di cerca.
Pa medio di esaki, ta gradici Ministerio di Turismo y AAA entre otro pa e cooperacion. Esaki ta un bunita logro. Alabes ta recorda un y tur pa mantene cautela y keda cuida, pa asina no mester resorta na re-introduccion di mas medidanan y tuma pasonan cu ta afecta nos turismo y nos recuperacion economico!
