Pa comercio y trahadonan por surpasa e crisis economico cu COVID19 ta trece cu ne, Gobierno di Aruba a bin ta ofrece yudansa den forma di Subsidio di Salario. Desde mei companianan cu ta bin na remarca pa e yudansa aki ta haya notificacion door di SVb y ta haya un plaso di tempo den cual mester aplica pa e yudansa cu ta cubri un maximo di 60% di e salario di trahado.
E meta di e yudansa financiero aki ta pa durante e crisis di COVID-19 conserva cupo di trabou na beneficio di Aruba su economia. Den luna di november 2020, un total di 1610 compania a haya Subsidio di Salario pa por cumpli cu e salario di 20774 trahado. E suma concerni ta 29.5 miyon florin.
Te cu awor a brinda 244.7 miyon na yudansa den forma di Subsidio di Salario
Na mei tabata e prome biaha cu gobierno a brinda yudansa den forma di Subsidio di Salario. Na e momento ey 1661 compania a haya yudansa pa paga salario di 25714 trahado pa e suma di 44.4 miyon. Na juni a yuda 1634 compania y 22387 trahado pa e suma di 40.1 miyon.
Na juli ta 1470 compania cu 21335 trahado pa e suma di 35 miyon. Na augustus un total di 1583 compania a haya yudansa cu pago pa 20912 trahado pa e suma di 32.7 miyon. Den september 1573 compania y 20865 trahado a wordo yuda cu 32.2 miyon florin. Na october a yuda 1590 compania y 20877 trahado cu 30.9 miyon florin. Awor na november a yuda 1610 compania y 20774 trahado cu 29.5 miyon florin.
Pues te cu awor gobierno a brinda 244.7 miyon florin na yudansa financiero pa comercio den forma di Subsidio di Salario. Ta bon pa menciona cu Gobierno a paga Subsidio di Salario di lunanan di mei, juni y awor esun di november for di e fiansa cu ta haya di Hulanda. E otro lunanan e Subsidio di Salario a wordo cubri pa Presupuesto 2020 di Pais Aruba.
