E luna di maart ta un luna pa celebra Trabou Social. Mundialmente e luna di maart ta wordo mira como e luna di Trabou Social. Mescos cu resto di mundo, Aruba tambe ta pone atencion na Trabou Social, specialmente awor den e pandemia.
E aña aki, riba 16 di maart ta Dia Mundial di Trabou Social y e tema central di trabou social mundialmente ta “Fortalece Solidaridad Social y Coneccion Global ”.
Universidad di Aruba su programa di Social Work and Development ta para keto riba kico esaki ta nifica den nos comunidad y con por bisa danki na tur esnan cu ta eherce e profesion valioso aki.
Tur hende kisas conoce un trahado social cu a haci un impacto den nos bida. Ki impacto positivo el a trece pa bo? Na ki forma el a mehora bo calidad di bida?
E luna aki e palabra Trabou Social lo wordo uza poco mas cu normal den nos seno social p’asina comunidad compronde con importante e profesion aki ta na Aruba. Specialmente den e pandemia di COVID-19, caminda e Trabou Social ta un trabou esencial cu no por falta den ningun sector tanto social, laboral y di bienestar den nos comunidad. E mision di cada trahado social profesional ta pa mehora e bida di un ser humano y acudi pa yuda unda cu por na e necesidadnan basico di tur hende, cu mas atencion pa yuda empodera esnan mas vulnerabel den nos comunidad cu ta oprimi y/of bibando cu menos recurso.
Na Aruba conoce mas cu 130 trahado social, di kende un gran parti ta aporta na comunidad den diferente ramo, trahando cu diferente bario, cultura, muchanan, hobennan, e grandinan y esnan afecta pa COVID-19. Di e manera aki, bo lo encontra un of mas trahado social na scolnan, na hospital, den bario, den companianan. E trabou ta mas grandi cu hopi ta pensa y sigur uno indispensabel pa comunidad.
Asina ta, si bo a encontra un trahado social awe, ta su luna pues bise danki! Y si bo no conoce e profesion ainda? Cera conoci cu e profesion y bishita http://www.ua.aw/faculty-of-arts-and-science/swd/ pa sa mas. Of bishita e website www.ua.aw, Instagram of Facebook page.
