E Indice di Prijs di Consumo (CPI) pa luna di januari 2021 ta 96.89, loke ta representa un caida di 0.2% compara cu e indice di december 2020 (97.06). E cambio di e CPI pa e ultimo diesdos (12) lunanan (januari 2020 te cu januari 2021) ta -2.7%, un caida di 6.1 punto di porcentahe (ppt) compara cu e periodo corespondiente di aña pasa (3.4%).
E promedio anual di e tasa di inflacion pa e periodo di januari 2020 te cu januari 2021 ta -2.7%, un caida di 5.7 ppt compara cu e 3.9% registra den e periodo di januari 2019 te cu januari 2020. Durante e luna aki, seis (6) di e diesdos (12) sectornan a registra caida di prijs.
E caidanan cu tawata tin e mayor efecto riba e CPI a wordo registra pa e sectornan di “Recreacion y cultura” (-2.1%) y “Mobilario” (-2.2%), causando un efecto di -0.22 y 0.20 ppt, respectivamente. E caidanan den e restante sectornan a contribui cu un efecto di -0.23 ppt riba e CPI di januari 2021.
E caidanan aki a wordo contraresta parcialmente door di subida den e indice di e sectornan di “Transporte” (3.3%) y “Restaurant y hotel” (1.2) cu a contribui cu un efecto di respectivamente 0.39 y 0.06 ppt riba e CPI di januari 2021.
E subidanan den e restante sectornan a contribui cu un efecto di 0.02 ppt riba e CPI di januari 2021. E caida den e sector di “Recreacion y cultura” a wordo causa door di principalmente un caida di 3.7% den e categoria “Vacacion”, causando un efecto di -0.12 ppt. E caida den e sector di “Mobilario” a wordo causa principalmente door di un caida den e categoria “Aparato pa uzo domestico” (-5.9%), causando un efecto di -0.14 ppt. E subida den e sector di “Transporte” a wordo causa principalmente door di un subida den e categoria “Gasto relaciona cu uzo di vehiculo di transporte personal” (3.2%), causando un efecto di 0.22 ppt.
E subida den e sector di “Restaurant y hotel” a wordo causa principalmente door di un subida 45.1% den e categoria “Servicio di alohamento”, causando un efecto di 0.05 ppt.
E canasta di consumo di e CPI ta consisti di 408 bienes y servicionan. Compara cu december 2020, 30.1% di e bienes y servicionan aki a conoce un aumento di prijs causando un efecto di 0.61 ppt, mientras cu 52.2% ta mustra un caida di prijs, cu a contribui cu un efecto di -0.79 ppt y pa e restante 17.6% no tawata tin cambio den prijs.
Prijsnan di bienes a baha cu 0.2% y a causa un efecto di -0.09 ppt. Prijsnan di servicionan a conoce un caida di 0.2% y a causa un efecto di -0.09 ppt riba CPI di januari 2021. E CPIC (core inflation) – CPI excluyendo e efecto di energia y cuminda – a registra na januari 2021 un caida di 0.5%. E indice di energia – cu ta consisti di e productonan: electricidad, awa, gasolin y diesel a registra un caida di 8.0%. E indice di cuminda a registra un caida di 1.5%.
Bestaansminimum
E bestaansminimum pa un hogar consistiendo di dos (2) adulto y dos (2) mucha (edad 0-15 aña) na Januari 2021 ta Afl. 4,739, un caida di Afl. 121 compara cu januari 2020 (Afl. 4.860). E bestaansminimum pa un hogar di un (1) adulto ta Afl. 2,257, un caida di Afl. 57 compara cu januari 2020 (Afl. 2.314).
