Sub-inspector primera clase Kenneth Phillips awe mester a presenta den Corte ya cu su nomber ta aparece riba rol di trafico. Por corda ainda cu dia 19 di augustus ultimo el a causa un accidente, mientras cu e tabata bou influencia di alcohol.
Tur diahuebs Corte ta trata casonan di trafico y riba e dia aki tin biaha mas cu 50 persona mester presenta pa scucha ki boet ta impone nan pa infraccion di ley di trafico.
Kenneth Phillips tabata un di e personanan cu awe a bini dilanti.
A hay’e culpabel di maneha bou influencia di alcohol y tambe core auto cu un rijbewijs caduca. Na final Corte a impone riba dje un boet di 1250 florin. Si e no paga esaki, e mester bay 25 dia cera. Ademas di esaki, ta perde su rijbewijs pa shete (7) luna, pero condicionalmente, y dos aña di prueba.
Corte a orden’e tambe pa participa den un curso di e consecuencianan di maneha bou influencia di alcohol.
Tabata dia 19 di augustus ultimo rond di 2:00 am cu un accidente a sosode na Bakval. Ora cu e patruya a yega, a bin constata cu esun envolvi tabata nan propio hefe. Ta parce cu el a baha caminda dal den un auto staciona, cu e auto di trabou.
Na november ultimo a celebra cu ne su 40 añanan di trabou. Kenneth Phillips ta sub-inspector primera clase y ta encarga cu e maneho diario di polisnan uniforma di e districto di mas grandi di Aruba, esta Oranjestad.
