Den un conferencia di prensa awe mainta, presidente di Fundacion Rancho, Clifford Rosa, a divulga algun detaye di e preparacionnan andando den cuadro di e celebracion di diesdos aña di existencia di e fundacion. Pues, mañan dia 20 di april e Fundacion Rancho lo ta celebrando e gran logro aki, den cua pa diesdos aña largo nan a percura pa promove y preserva e aspectonan cultural como tambe historico di e bario di Rancho.
Rosa a inicia su discurso gradiciendo presencia di prensa y a splica cu ya a bira un tradicion cu riba dia 20 di april nan ta purba di introduci e tema p’e proximo aña di trabou cu nan lo eherce y e biaha aki lo atende cu varios tematica. Ta trata aki di entre otro un gradicimento na tur e contribuyente- y boluntarionan y tambe un danki na e comunidad pa e apoyo y sosten pa e trabou cu nan ta eherciendo como fundacion.
Tambe el a amplia un poco rib’e importancia di ta na altura di unda nos ta bin, pues con nos herencia ta hinca den otro y tambe e informacionnan historico. Pa Rosa ta un orguyo cu nan ta cumpliendo diesdos aña “conscientisando, educando e comunidad di Aruba, pero mas bien tambe hayando nos educacion cu nos tin mester den e region aki.”
Dia 20 di april pa 6:30 pm lo bay tin algun presentacion di algun artista di La Guajira, esta un region cu Fundacion Rancho a bin ta percura pa tene un miso laso y comunicacion cu ne p’asina papia riba siguridad di alimento, cu lo bay duna algun presentacion. Den esakinan lo duna un contexto riba e importancia di e intercambio cultural y comercial entre Aruba y La Guajira. Esaki lo bay tuma luga na Gerrit Rietveld Park.
Tambe lo bay intensifica riba e topico di conscientisacion di e 200 aña di Oranjestad y den esaki lo bay enfoca riba e importancia di e ‘kooplieden kwartier’, esta un area di importancia p’e desaroyo di Oranjestad y cu esaki kier educa e comerciantenan den e areanan di Oranjestad p’asina nan ta mas consciente di e historia di esaki pa por mehora y curasha mas inversion den Oranjestad “ban proteha nos herencia…ban proteha Oranjestad, e capital di Aruba.”
Fuera di esaki lo bay tin discurso tambe di rector di Universidad di Aruba, Viola Heutger, invitado di La Guajira, Maria Isabel Cabarcas, Joyceline Croes y Dandy Osorio. Fuera di esaki lo tin tambe un presentacion di sorpresa, algun cuminda y bebida. Tur esaki den un rato ameno celebrando nos bario di Rancho. Pues, un programa extenso ta locual lo bay tin dia 20 di april 2022 den cuadro di e celebracion di diesdos aña di existencia di Fundacion Rancho na Gerrit Rietveld Park cuminsando pa 5:30 pm.
Pa mas Lesa TREMPAN.