Stephen Warloud (PAR): Moses ta inkonfiabel i di mala fe!

322

Ta inkreibel ku Sra. Moses a sinta ketu den sala di korte i laga hues kambia e dia original ku e tabata pa dikta sentensia den e kaso entamá pa parlamentario Sr. Elhage (PAR) kontra entre otro tur 20 sobrá parlamentarionan. Hues a kambia e dia original pa dikta sentensia (ku ta djaluna 10 di ougustus 2020) pasó Sra. Moses  den sala di korte a bisa ku e ta koperá ku quorum pa asina kredensialnan di Sr. Elhage wòrdu tratá den e siguiente reunion públiko di parlamento yamá.

Esaki a base ku Sra. Moses a haña i a komprondé e splikashon amplio di hues ku e manera Sra. Moses i otronan tabata interpretá artíkulo 126 di nos kiesregelement, no tabata e interpretashon korekto. Dikon Sra. Moses no a bisa hues pa no kambia e fecha original di dikta sentensia? Dikon Sra. Moses a keda ketu? Ta inkreibel tambe ku Sra. Moses a sinta ketu ora a bin e sugerensia den direkshon di Sr. Elhage pa trèk in e kaso numa pasombra Sra. Moses a bisa di lo a bai koperá ku quorum ya ku e la haña klarida di hues. Es mas. Sra. Moses a bolbe sinta ketu ora abogadonan a kuminsá interkambiá palabra ku otro i puntra hues pa duna klaridat tokante e gastunan enbolbí dado kaso Sr. Elhage trèk in e kaso.  

Pues Sra. Moses a sinta ketu i laga tur hende – inkluso wes – kere ku e kaso sumario a kaba na aros i koko i ku no ta nesesario mas pa hues dikta sentensia, pa despues e mesun Sra. Moses sali for di sala di korte i denter di un par di ora laga presidente di su partido deklará ku e notisia ku tabata kore ku Sra. Moses lo a bai koperá pa yega na quorum ta ‘fake news’ i ku Sra. Moses ta warda sentensia di wes. E akto aki ta pone hopi klá riba mesa ku Sra. Moses deliberadamente a burla di hues i a pone tur sobrá hende den sala di korte, inkluso prensa, riba e pia robes. Banda di esaki Sra. Moses a konfirmá ku e no ta di konfia, ku e ta di mala fe pa ku su kolega parlamentario Sr. Elhage i ku defakto e ta di mes un nivel anti demokrátiko ku su koleganan parlamentario di MFK, PS i KDNT maske kuantu e la purba di mustra ku ‘e sí’ ta diferente. Realidat ta ku den sala di korte Sra. Moses a papia un kos ku tur su konsekuensianan, pa despues bin pafó bin papia otro kos.