Manera a bira conoci caba, pa tur amante di e genero musical Jazz, luna di april ta celebra mundialmente e aprecio pa jazz. Un di su promotor y exponentenan di mas grandi riba nos isla, esta e maestro di percusion Carlos Bislip a sa di prepara, un biaha mas, un merecido celebracion.
E cita pa disfruta di un anochi di bon musica ta diamars 30 di april proximo na Kulture Café na San Nicolas, cuminsando pa 7:00 pm. Entrada ta gratis cu un varios agrupacion local y internacional interpretando un repertorio amplio pa deleita bo bou di nos shelo y e streanan.
Jazz Appreciation Month of JAM ta un iniciativa di e instituto Smithsonian na Washington, DC cu posteriormente, na november 2011 e United Nations Educational, Scientific and Cultural Organization (UNESCO) oficialmente a dedica 30 di april como e Dia Internacional di Jazz cargando e obhetivo original, esta di resalta e musica cu ta uni mundo mas cu cualkier otro genero.
Na Aruba ta celebrando JAM desde 2006, danki na Carlos Bislip. E prome concierto tabata den Cas di Cultura, pero den ocasion tambe tabata na Biblioteca Nacional. E aña aki ta e di diesnuebe edicion y pa di dos biaha consecutivo cu ta organise na San Nicolas. E decision aki ta danki na e reaccion positivo di e publico.
Rapidamente Bislip a ripara cu JAM tabata un plataforma excelente pa fomenta nos talento local. Di e manera ey, el a combina e studiantenan di scol di musica cu musiconan local, brindando e hobennan un experiencia hopi util. E resultado ta excelente ya te cu awor aki, 20 di esunnan cu a participa den JAM a scoge pa sigui nan estudio di musica den exterior.
E aña’ki no ta diferente, un alrededor di 20 hoben musico formando parti di Caribbean Combo, bou direccion di Carlos Bislip cu lo toca poco tema cu influencia di funk, reggae y mambo. Pa prome biaha den JAM lo introduci vocalistanan Osdelys Wester, Tabitah Heemstad y Pearl Dumfries acompaña pa un kwartet presentando versionnan di tema local.
Segun Bislip, e pianista Timothy Naddall, kende ta un hoben hopi prometedor. Tambe ta forma parti di e concierto cu temanan estilo fusion. Sigui pa Richard Holmond, drummer di gran trayectorio cu un combinacion di jazz y tema di artistanan di nos region. Holmond ta un musico, kende despues di varios aña a logra sincronisa schedule di JAM ya cu e tin hopi presentacion. Siguientemente lo presenta Carlos Bislip Tipico Jazz, nomber cu el a duna na e combinacion di amigonan musico, ya cu ta bay enfoca riba e folklore Arubano, ademas di algun propio composicion.
Pa clausura e anochi ta conta cu artistanan di exterior. Na prome luga tin Freddie Franken, kende ta un Arubiano residencia na Merca. Franken ta profesor di guitara na un universidad di Chicago. Su tras lo haya e musico Mericano Chase Baird, kende tin un trayectorio largo y actualmente Chase ta bibando na Aruba.
Carlos Bislip ta invita tur fanatico di Jazz pa no perde e oportunidad valioso aki pa bin disfruta di un anochi cu musica di Jazz na Kulture Café na San Nicolas. E concierto ta cuminsa pa 7’or di anochi, ya for di 6’or di atardi publico por cuminsa yega y tuma nan luga den e espacio pafo dilanti escenario. Ta recomenda pa trece bo mesun stoel y mesa door cu e cantidad di esakinan ta limita y completamente reserva.
Un danki na tur nos colaboradornan valioso di entidadnan local manera Aruba Tourism Authority Sui Generis, Aruba Airport Authority N.V., Departamento di Cultura Aruba, UNOCA, Prins Bernhard Cultuurfonds, Kulture Café, Setar N.V., Jack Daniels y Vibration PR cu ta haci e concierto di JAM posibel. Un concierto gratis pa comunidad di Aruba por disfruta.
