Gobierno a para “Drive Thru Testing” di Urgent Care/MedLab

9089

Aunke cu tur cos tabata cla y Gobierno a coopera pa pone Harbour Arena disponibel como e sitio asigna pa haci testnan masal desde awe, toch ayera Minister Presidente a para henter e proyecto aki. E chens pa un compania priva gana hopi cen durante e pandemia aki, a cay completamente na awa. Esaki precisamente pa motibo cu nan kier test, pero no tin test den stock y riba dje, no ta cumpli cu nan promesa.

MedLab, un compania di Dr. Yagua Fingal, cu ta maneha su consultorio di Dokter di Cas hunto cu laboratorio MedLab y Urgent Care, tur bou di un solo adres, Noord 63, ta esun cu a pidi permiso pa haci testnan masal desde awe. Parce cu e testmento na Noord ta causando inconveniencia pa henter e bario y e trafico. Bisiñanan no por drenta ni sali for di cas y negoshinan eybanda ta sufri di e trafico congestiona.

Den fin di siman a core drecha Harbour Arena pa testmento masal awe dialuna. Sinembargo, Gobierno a para e idea mesora pasobra e laboratorio no por traha mas lihe cu e laboratorionan di Gobierno, pues no tin un balor agrega na e sitema di test awo.

Cu esey den mente a pensa pa muda e operacion pa Harbour Arena, unda ciudadanonan por yega den auto, registra y test sinta den auto mes. E laboratorio ta kere cu asina por test mas hende pareu y sin mucho inconveniencia. Claro, e servicio di MedLab no ta gratis, pues ta cobra Afl. 175 pa cada test. Si conta cuanto hende a test, ta facil pa conta e entrada adiciona cu laboratorionan ta hayando awo, mientras cu di otro banda, cuanto gasto adicional AZV tin pa cubri e testnan cu ta bay via Dokter di cas.

Pero a bin un desaroyo acerca: MedLab no tin mas test pa haci y den fin di siman a acerca Gobierno pa e haya testnan di DVG y HOH. Ambos a nenga di duna un compania priva nan testnan pasobra nan mes mester pa maneha Aeropuerto, Hospital y e pashentnan cu Dokternan di Cas ta mandando. Di e forma ey MedLab di Urgent Care a keda sin test adicional, te ora e logra importa for di exterior.

Ta bin acerca cu e filanan largo di auto pa test eynan a mustra un scenario cu tabata mas pendiente pa haci test pa loco, sin pensa cu mester procesa e testnan aki pa yega na un diagnostico y resultado satisfactorio y confiabel! Hendenan cu a test diaranson a haya resultado ye diasabra, mustrando cu e laboratorio no por a responde na e demanda y cumpli cu su promesa di duna resultado den un dia!

Di otro banda, a bin demasiado keho den comunidad cu tin testnan considera como “false positive”. Pues ta hende cu a bay MedLab na Urgent Care y a haya resultado positivo y despues cu a bay DVG a haya resultado negativo. Riba su mes, esey por! Un hende por ta positivo awe y negativo mañan, e test ta un “moment opname”.

Pero, riba Facebook ta mirando demasiado di e casonan aki ta aparece, pues di ciudadanonan cu tin un resultado positivo y to negativo, cu ta trece duda den e veracidad di e testnan PCR aki. Por lo menos un specialista, ex-Presidente di Asociacion di Specialistanan di Aruba a vocifera su opinion publicamente tambe, puntrando kico ta pasando cu tin tanto test cu resultado falso. E por crea e impresion cu ta haci test pa loco y cu atencion riba e placa y no riba calidad di e resultado di test!

Cu e decision di awe, Minister Presidente ta tene cuenta cu si Urgent Care no por maneha ni locual el a haci den Noord, no tin speransa cu e por maneha locual e kier logra pa henter Aruba awo. Tambe ta tene cuenta cu Gobierno tin su mesun LabHOH cu diariamente ta maneha centenares di pasahero na Aeropuerto y pashentnan cu Dokternan di Cas ta manda pa test, sin problema y cu resultado cla den 7 pa 12 ora.

Si e sistema di Gobierno ta funcionando, no tin necesidad pa “inventa ningun wiel” pa enrikese laboratorionan priva. Pasobra de facto, si hende test pa loco asina, ta den man di e mesun sistema di Dokter di Cas y AZV lo Bo cay toch despues si acaso Bo ta positivo. Cu tanto resultadonan “dudoso”, e chens ta grandi cu Bo Dokter di Cas lo bolbe manda Bo test pa ta sigur cu Bo tin Covid-19 despues di bin cu resultado di un laboratorio priva.