Hopi ta esnan cu ainda ta keha cu ora di yama Departamento di Impuesto (DIMP) ta masha dificil pa haya nan riba telefon. E departamento tin su call center. Nan ta purba di rema cu tur e recursonan cu tin, actualmente cu un Call Center di shete hende caminda cu e personanan aki ta atende cu telefon. Nan tabata tin un upgrade di nan sistema di telefon recientemente pa un sistema mucho mas moderno. Antes bo ta haya un aparato ta atende cu yamada si e operadornan ta den otro liña. Awe tin un opcion pa scoge entre diferente servicio brinda.
Na momento cu scoge un servicio cu kier un areglo di pago, e ta ring na mas otro telefon di e funcionarionan atendiendo cu cobransa. Asina aki ta purba na structura yamada. Pasobra si nan ta haya miles di yamada ariba un dia, e shete personanan aki no ta suficiente. “Dus nos a purba structura e yamadanan y nos tin reunion pendiente cu esunnnan cu ta lidera esaki cerca nos, y personanan cu a implementa e sistema. Pa nos haya data pa asina ora tin esaki lo comparti cuanto yamada a drenta of cuanto hende a bandona e yamada ora a tarda pa contesta,” ta informacion cu Luenne Gomez-Pieters (Director di Dimp) a comparti cu nos.
Di e forma aki si e yamada drenta via front office pa e back office, si e personanan den back office a gara telefon of no, of si yamada a bini bek, ta hopi datos cu awor DIMP ta dispone compara cu cu antes no tabata tin pa motibo di ta traha cu un sistema anticua. Esaki ta brinda nan miho guia pa sa cuanto yamada ta drenta pa midi un tiki mas e servicio y mehor’e mas ainda.
Ta tiki trempan pa bisa si esaki ta mehorando te cu ainda segun director di DIMP pasobra ainda tin hopi pa haci, pero ta riba e bon caminda. “Na mi opinion e no ta riba e standard cu nos lo mester brinda ainda. Mi ta hopi honesto cu esey. E servicio na cliente mester mehora cerca nos.” DIMP a haya diferente feedback tambe di adultonan mayor cu no kier yama na telefon, nan kier papia personal cu hende y haci pregunta, bin cu calculator etc, dus pa nan tambe ta bezig pa wak con por ubica nan. Pandemia a pasa, dus mester por tin otro maneho pa loke ta servicio na cliente.
