Diabierna 6 di juli na di Universidad di Aruba, Stephanie Arango Trujillo a defende su tesis exitosamente dilanti di e comision di graduacion cu tabata consisti di dr. Mieke de Droog, Judelca Briceño MSc y Sr. Armando Love, Director of Training & Development Wind Creek Hospitality.
Stephanie a haci su pasantia na Renaissance Aruba Resort & Casino den departamento di Recurso Humano. Prome cu esey el a traha den e mesun departamento di Recurso Humano den vakantie grandi y como part-timer. Durante di su pasantia Stephanie a haci su prome research pa e organisacion y el a experencia cu e departemento tin interes den mas investigacion riba temanan relaciona cu recurso humano. Pa su tesis Stephanie a scoge pa investiga e procedura di recluta empleado na Renaissance Aruba Resort & Casino. El a scoge e topico aki pasobra e kier a investiga con e procedura di recluta empleado na e diferente departamento di e organisacion ta actualmente y con por mehor’e.
Stephanie a haci un investigacion cualitativo. El a entrevista 18 persona tanto manager y empleado di 4 diferente departamento. Asina el a colecta varios perspectiva valioso tocante e topico interesante aki. A base di e perspectiva di e manager y e empleadonan y e teoria cu el a studia Stephanie a diseña un procedura nobo pa recluta empleado pa henter e organisacion.
Stephanie a gradua den 4 aña cu un lista di cifra impresionante. El a participa na e programa di intercambio di Universidad di Aruba y asina e la studia un semester na Arteveldehogeschool na Belgica. Tambe el a participa na e proyecto di investigacion entre Universidad di Utrecht y Aruba (UCUUA). Esaki a resulta den su prome publicacion den e buki cu tin e coleccion di investigacionnan di e proyecto pa 2017-2018. Universidad di Aruba, particularmente e departamento di ‘Organization, Governance, and Management’, ta felicita Stephanie cu e logro aki y ta dese’e tur clase di exito pa su futuro carera. Pa mas informacion riba e estudio OGM, bishita e pagina di web di Universidad di Aruba na http://www.ua.aw/OGM y e pagina di Facebook cual ta https://www.facebook.com/pages/University-of-Aruba-OGM-Organization-Governance-Management-FAS/
