Invershon máksimo den nos enseñansa, edukashon i formashon, ta forma parti integral di e plan maneho di Gabinete Rhuggenaath. Segun e Akuerdo di Gobernashon 2017-2021 gobièrnu su vishon ta pa krea oportunidat pa kada siudadano, espeshalmente nos hóbennan, por desaroyá nan abilidat i talentonan.
Den kuadro di esaki Ministerio di Enseñansa, Siensia, Kultura i Deporte (ESKD) na komienso di aña eskolar 2017-2018 a duna diferente hóben e posibilidat pa kore stazje denter di e ministerio. Awor na final di e aña eskolar, Ministerio di ESKD ku hopi orguyo ta anunsiá ku 3 hóben di University of the Dutch Caribbean (UDC) a finalisá nan periodo di stazje i estudio ku gran éksito.
- Rubinah Manuel a gradua komo studiante di “HBO rechten” ku su tésis titulá “Leerplicht”.
- Damaries Plate a gradua komo studiante di HBO rechten ku su tésis titulá “Leerplicht binnen scholen op Curaçao”.
- Seajea Freitas a gradua komo studiante di HBO studiante Sociaal Juridische Dienstverlening ku su tésis titulá: “Leer- en vormingsplicht en de aandacht voor vroegtijdige schoolverlaters op Curacao”.
E resultadonan ta keda usá pa sigui fortifiká maneho riba e terenonan ariba menshoná.
Ministerio di ESKD ta kontentu ku e studiantenan a hasi uso di e oportunidat pa nan sigui desaroyá nan mes i ta desea kada unu hopi éksito ku e siguiente fase di nan desaroyo.
