Diadomingo ultimo piscadonan di Aruba henter a celebra Dia di Piscado cu un candente torneo di pesca y ambientoso dia di famia cu un festival di cuminda di lama, aya na beach dilanti di Centro di Pesca Hadicurari.
E aña aki e cantidad record di 50 boto inscribi a pone un toke excitante na e torneo di pesca cu for di marduga piscadonan a bay pisca, pa den oranan di atardi yega pa pisa esaki pa un total di casi 1200 Kilogram di pisca valido.
Bon Ambiente:
Ni awacero di bendicion torencial por a desvia di e celebracion dilanti di e pier unda e dia di famia a gosa di ambiente musical tremendo mientras por a saborea platonan di cuminda di lama bou di varios tent na beach, mescos cu un bar a la piscado. Piscadonan a luci atrobe den nan camisanan di seguridad riba lama cu e centro ta provee na tur participante.
Ganadornan Mayor Ehemplar:
Tabata tin premio pa varios tipo di pisca. Ganador di e Pargo Cora mas grandi tabata pa e boto Shoustienne di Chin Kelly y famia, cu un pargo cora di 6.1 kilo. E Dorado di mas grandi a bay pa e boto Shakim di Capitan Raul Croes y Rocky Petrochi pisando 7.2 kilo. E boto di Rudshirley di Capitan Louchi Eduwardo y rumannan Nacho y Nando, a pisa un carpitan gigante pisando 9.1 kilo. Un Pishiporco di di 2.9 kilo treci aden pa e boto Vilenska di Capitan Omar Andrade a bay cu Mayor Ehemplar Pishiporco. Picuda di mas grandi a bay pa Picuda Boys di e boto Shahayra di Capitan Chin Christiaans pisando 5.9 kilo. E boto Juliana di capitan Yek Christiaans, Eddy Webb y Randy “Topo” Loopstok” a marca un Mulato di 10.4 kilo. E boto Pochito di sr. Carolina a trece un Djampou Rabi Gay pisando 14.9 kilo pa Mayor Ehemplar Djampou di e torneo. Conofes mas grandi, pisando 12 kilo, a bay pa e boto Sagmary di capitan Mercelino Clarinda. E mayor ehemplar di henter e torneo a resulta di ta un Brasi di 26.2 kilo.
Ganadornan mayor kilahe pa categoria:
E premio pa boto crioyo cu mas kilahe a bay pa e boto Shahayra cu tabata tin 69.2 kilo. E boto Shahayra alabes a bay cu e prome lugar den categoria crioyo/tradicional tambe y e pot cu e piscadonan mes ta pone. Na di dos luga den e categoria crioyo tradicional a keda e boto Juliana di Capitan Yek Christiaans cu 66.1 kilo y na di tres luga den e categoria crioyo tradicional a keda Rudshirley cu 47.6 kilo.
Na di tres luga den categoria open a keda Persistence di Capitan Marcelino de Jezus cu 73.5 kilo. Na di dos luga, e boto Vilenska di Omar Andrade cu 82.4 kilo y ganadornan absoluto di categoria open y alabes ganador di e pot, tabata e boto Tonino di Marcel y Leo Briesen cu nada menos cu 142.8 kilo
A honra dos baluarte:
Manera ta e tradicion a rindi homenahe na dos baluarte di piscamento. E aña aki tabata sr. Leoncito “Chito” Rasmijn cu a haña un reconocimento special pa su contribucion. Como fanatico ferviente di pesca di baranca y tur otro tipo di pesca e ta promove piscamento den tur forma posibel. Sea riba medianan social, organisando torneonan di pesca of dunando curso na hobennan, Chito semper ta contribuyendo na piscamento di Aruba.
E otro galaradonado di e aña aki ta sr. Francisco Franken. Conocido beheerder pa añanan largo na Hadicurari, ex-empleado di seccion di pesca di Santarosa sr. Franken ta bon conoci na tur skina di comunidad peskera di nos isla. Sr. Franken despues cu a bay gosa di un merecido pensioen a sigui activo como voluntario na diferente forma tanto na torneo como pesca en general y ta masha aprecia cerca piscadonan.
Danki:
Organisadornan, Santa Rosa y Fundacion Centro di Pesca Hadicurari, ta gradecido y ta felicita tur piscado, participante, particularmente e ganadornan y baluartenan. Danki na publico y tur voluntario pa haci e dia uno exitoso un biaha mas. Un danki special na e generosidad di patrocinadornan cu un biaha mas a otorga varios premio special pa tur participante. Nan ta mucho pa menciona pero di curason ta gradici cada uno cu a contribui. Danki!
