Awe nochi algun minuut pasa di 8:00pm a sosode un caso di hit and run riba e rotonde di Piedra Plat, na altura di Bright Bakery. Un auto desconoci a dal den un auto marca Volvo modelo SUV numera A-508305 y despues a baha na awa!
Den e auto tabatin un grupo di studiante for di Inglatera cu a bin core stage na Aruba na Donkey Sanctuary. Apenas nan tin 24 ora riba nos isla y ya a haña nan mes den un accidente. Entre nan tabatin un dama di 52 aña di edad, cu tambe ta un studiante, cu a cay flauw den e impacto. Probablemente e emocion y spanto a hunga un rol den esaki.
Mesora a pidi asistencia medico. E herido alabes tawata sinti su brasa door di a wordo sacudi den auto. Ningun di nan den e auto a logra capta number of tin descripcion di e otro auto. Polis a tuma tur datos y daño material a keda na un minimo.
