Awe a sosode un situacion masha peculiar na aeropuerto internacional Reina Beatrix, ora cu un pasahero contagia cu Coronavirus a purba subi avion rumbo pa Merca. El a logra pasa Migracion, checkpoint di siguridad y hasta na US Customs and Border Patrol. Pero e no a logra subi avion si, pasobra e personal di Departamento di Salud di Aruba (DVG) a identific’e y a bay cu ne, sac’e for di aeropuerto. Claro cu el a causa un consternacion y mester a wanta tur procedura pa un bon mey ora pa por a desinfecta e areanan prome.
E turista a yega Aruba ayera for di Washington DC cu United Airlines. Mescos cu tur otro pasahero cu yega Aruba, sea ta bin cu un test haci recien of mester haci un test aki na Aruba di nobo. E ultimo aki a sosode y ayera nochi mes a inform’e cu el a test positivo pa Coronavirus y cu e mester bay den isolacion mesora. Den casonan asina, ta hinca pashentnan contagia den un otro luga cu no ta e hotel, pa evita mas contagio.
Pero e turista a bira “sabi” y pa e no mester keda dos siman pega na Aruba isola, el a purba “scapa” di DVG awe y toch purba biaha awe mes bek pa Merca. Probablemente e lo kier a evita e tratamento aki na Aruba of core e risico di bira malo pafo di su pais. Locual e no a tene na consideracion ta e hecho cu burla di e ordo di isolacion ta castigabel pa ley y por hinc’e hasta den problema cu husticia riba nos isla.
DVG a escolta e turista awe pafo di aeropuerto y a hib’e na un luga sigur unda e lo mester hospeda por lo pronto, isola y leu for di tur hende. Cruz Cora mes lo percura pa tur dia e haya cuminda y su remedinan den caso cu e haya sintoma y bira malo. No ta conoci si e ta sintiendo malo caba, pasobra obviamente e mes no tabata sa cu e ta contagia sino te ayera nochi ora su test a sali positivo.
Cu e hazaña di e turista di awe, ta importante pa asina cu DVG identifica un pashent positivo, pa duna Migracion su nomber pa evita cu ta purba cambia nan pasashi y toch bula pa nan pais di origen. Mientras cu kisas nan ta pensa cu asina nan a “libra” nan mes di gastonan medico of pa evita problema pa Aruba, ta net lo contrario, asina nan tin mas chens di contagia otro hendenan den aeropuerto y den avion ora di biaha.
Di acuerdo cu DVG, di ayera pa awe a bin 17 caso nobo, di cual 5 di e casonan ta turista cu a importa e virus aki na Aruba. Ta un di e cinco pashentnan aki a purba biaha awe bek pa Merca! Cu e cantidad aki, Aruba awe tin 171 caso activo, cu ta hopi mas di locual nos tabatin e ultimo simannan aki unda hasta nos a baha bou di 100 casi activo despues di bastante siman.
