STA: Pa manda hende cas Triple A mester ofrece un miho pakete

785

Sindicato STA a reuni cu Mediador di Gobierno hunto cu gerencia di AAA riba un situacion andando. Diego de Cuba, presidente di e sindicato a indica cu nan ta pega den e combersacionnan y dialuna lo continua cu e negociacionnan. Awor aki mediador lo bay haci su huiswerk y dialuna awo, lo continua cu e deliberacionnan.

Tin cu bisa si cu locual cu ta pasando na Aeropuerto, di parti di STA, ta haya cu gerencia ta actuando toch di mala fe, den nan concepto, mirando e hecho cu nan a compronde cu e hunta directiva a ricibi un carta for di Minister Dangui Oduber for di augustus, caminda cu minister a haci un solicitud riba nan pa para tur e negociacionnan cu sindicato. Y pa pospone retiro di trahadonan te cu januari otro aña pa wak con e situacion ta cana.

AAA na mesa cu mediado di Gobierno y sindicato relaciona cu pakete cu a ofrece empleado

Posted by 24ora on Friday, September 18, 2020

De Cuba ta kere cu tin espacio tambe pa por wanta esey. Pero gerencia di AAA ta pusha pa manda mas hende cas. STA logicamente nan tarea ta pa trata di wanta mas tanto hende posibel na trabao. Pero awora cu mediador a bin acerca, locual cu ta boga p’e ta cu  si kier manda hende cas, mester bin cu un miho pakete riba mesa. “Si no por bin cu un miho pakete riba mesa, e ora ey ta kere cu e cos aki tin cu bay caba den Corte.”

Negociacionnan pega

Segun de Cuba, AAA kier kita mas hende for di trabao. Tin 27 hende cu a bay cu un pakete boluntario. Apart di esaki kiermen cu kier bay reorganisa pa prome di januari 2021 pa bin cu un organisacion mas chikito.

Si wak’e bon, nan kier bay spaar placa. Den un situacion asina aki, manera cu nos pais ta confrontando e crisis aki, bay manda mas hende cas, ta mas problema social ta crea. Esey ta locual cu STA kier purba di evita. No tin miho testigo cu tempo.

Pero nan ta consciente cu e situacion no ta facil. E di dos ola a dal Aruba bastante formal. Apesar di esey turistanan ta keda drenta Aruba y ta contento cu esey tambe.

No por kita afo si cu si kier reorganisa, nan mester acepta esaki pasobra na final di cuenta, ta bay haya ta corta toch den e cantidad di empleadonan.

“Si ta bay haci’e, paga e hendenan aki cos drechi. Esey ta e punto di bista di STA. Si kier pa nan bay, mester paga nan bon. No por djis tira nan riba caya y den un aña (of aña y mey) nan placa caba y anto kico ta bay sosode e ora.

Tur hende sa cu no tin trabao na Aruba y un salario cu ta gana na AAA no ta bay haya otro caminda asina facil y tampoco e beneficionan.

Locual ta indigna di Triple A ta e falta di aprecio cu tin pa hendenan cu tin hopi aña di servicio. Esey ta duel e sindicato masha hopi. Tambe a bisa nan cu kier yega na un minimo cu locual ta bay duna e hendenan, si kier pa nan bay. Conforme ley, si tin un of dos aña trahando, loke tin di duna ta casi nada. Terminacion ta masha tiki mes. A bisa nan cu kier mantene na un minimo y e ora ey pa sikiera e hendenan por sobrevivi sikiera un aña.

Segun Diego de Cuba, e cos aki por desemboca te den Corte. Si AAA no yega na locual cu e exigencianan ta, e ora ey nan lo tin di bay coy caminda di Corte. Esey lo ta te otro aña. 4