Departamento di Cultura Aruba a ricibi noticia tristo cu otro gran baluarte den nos cultura Sr. Carmelo Heyer, compositor, autor, cantante, musico y un trovador a bay laga nos. Lagando atras un tesoro y herencia musical.
Carmelo Heyer a naci na Santo Domingo R.D., Barahona Perla del Sur, riba dia 11 di november 1932. Su kerida mama ta di Santo Domingo y su tata ta di nos isla ruman Curaçao. Hunto como famia nan a bini e tempo aya na Antiya Hulandes. Sr. Carmelo tabatin 8 aña e tempo ey y no a bolbe bek Santo Domingo sino te na grandi. Pa por a conoce y integra el a studia na Curaçao. Despues cu 24 aña Carmelo a bini Aruba na unda el a traha duro manera tur bon ciudadano honesto cu idea di engrandece nos país Aruba y haciele su hogar.
Manera sr. Carmelo a bisa: “Di kico ta bal si bo nace na Aruba y bo no ta stimele. Amor pa bo patria ta e amor cu ta sali fo’i bo curason.” El a expresa cu el’a tuma e tribilidad di bisa: “Mi isla, pasobra asina mi ta sinti y mi amor pa Aruba t’asina grandi cu dia mi muri unda cu ta, mi ultimo deseo ta pa mi ser dera na mi isla, mi país Aruba.”
Sr. Carmelo Heyer tabata presidente di Aloë di Oro, e idea di aloë a bini na dje fo’i aña 1971. Pero e tempo ey e no tabatin fondo of moda pa logra forma e directiva pa pone nos artistanan den nos historia cultural di nos país Aruba. Aruba cu fo’i su curason tabata semper su país. Awe nos país cu ta e perla den mar Caribe.
E tin un dicho ta bisa: “’Mas vale tarde que nunca’. “Mas bal laat cu nunca” y nunca ta laat pa haci algo cultural y bunita pa bo país.”
“E cultura mas grandi y mas bieu ta musica y un pueblo cu no sa canta, yora, hari, y skirbi, ta un pueblo sin cultura. Aruba ta un pueblo rico na cultura y grandi den amor.”
Cu orguyo, dignidad y honor el a sigui bisa: “Cu mi tambe ta un Arubiano y cu e sanger cu mi curason ta pomp ta Arubiano.”
Na 1993 a realisa e ‘Festival Aloë di Oro’.
E tin varios composicionnan y como trovador tabata trece nan dilanti. Su composicion mas stima p’e tabata y ta awe pa hopi di nos tambe. Ta esun titula ‘Mi Aruba’ den ritmo wals. Akinan parti di su letra;
‘Mi Aruba’
No tin tera mas bunita cu mi tera.
No tin solo cu ta lusa mas cla.
Tur su playanan ta rico di blancura
Y su hendenan di noble curason.
Mi Aruba ta e isla di Caribe
cu ningun isla no por compara cune.
Di mi alma ta nace sintimento
Pa canta ‘bo cu henter mi curason.
Youtube:
Cancion: ‘Mi Aruba’ , graba na Colombia den añanan 70.
Sr. Carmelo a stima nos país asina tanto cu e tabata un baluarte den historia di su partido M.E.P., fiel campañado y kende a sostene e lucha di sr. Betico Croes d.f.m.. Un cantante, compositor cu a compone varios cancion pa su partido y su lider Betico.
El a presenta den diferente programa na Tele Aruba, manera Cocktail Musical, Show Time, a canta hopi tempo na Talk of the Town. Conoci como un di e miho bolerista tambe cu un variación di tur e miho boleronan na idioma Spaño y Papiamento
Aruba ta perde otro gran baluarte di cultura, compositor, canta autor, musico, trovador y un gran persona den sr. Carmelo Heyer.Departamento di Cultura Aruba, Director, Staf y Personal ta extende palabra di condolencia na henter su famia, amistad, conocinan, amante di bolero, y demás famia. Mundo musical na Aruba ta di luto.
