Ta parce cu tin un problema structural entre DVG y LabHOH relaciona cu testnan di Covid-19. Mas y mas ciudadano ta yamando pa raporta cu nan test a sali negativo pero pa un motibo of otro nan test ta aparece como positivo cerca DVG. Pero e situacion ta bira pio, awor cu DVG ta menasa di duna multa di mil florin na un ciudadano cu ta negativo na LabHOH pero ta positivo den e sistema di DVG!
Louise-Ann Rollock di Caya Soeur Dorothea # 37 na Bushiri a haya sorpresa di su bida ayera. Como cu e ta traha cu turista na hotel, su Dokter di Cas a mand’e haci test dia 4 di september ultimo, tambe pasobra e tin hende vulnerabel den su cas. Pa 3:30pm el a bay na e testcenter na Hospital y su siguiente 1:00am el a haya contesta cu su test a sali negativo. Su mañan mes el a bay traha manera nada a pasa.
Pero ayera diaranson, el a haya un yamada via un number di celular riba su mesun celular priva. Ey e homber a identifica su mes como Taskforce di DVG, cu ta na su cas pa control’e pero cu e no ta na cas. Tambe e ambtenaar a bisa e ciudadano cu “Ta danki na hendenan manera Boso cu e virus aki ta plama tur rond riba nos isla”. Claro cu e ciudadano no a aprecia e forma di papia aki y pio cu ta DVG ta robes den nan maneho y cu e datonan na DVG no ta corecto!
E ciudadano concerni a yama oficina di DVG pa pone un keho, no solamente pa e trato, pero tambe pa e eror constante den servicio di DVG. Ey e señora cu a contesta su yamada a bis’e cu pa colmo e dia ey, diaranson, a drenta bastante yamada di ciudadanonan cu ta reclamando pa e mesun motibo aki. E ambtenaar na DVG a bisa cu e ta sospecha cu nan lo a haci un eror interno y lo a inlui tur e casonan negativo riba e lista di casonan positivo. E ta pensa esey pasobra ta varios ciudadano a haya sea yamada of control di Taskforce aunke nan ta negativo.
Louise-Ann Rollock a vocifera su critica formal contra maneho di DVG, cu ta mandando pashentnan bay traha despues di 7 of 14 dia sin cu nan a mira e pashentnan y sin evalua si e pashent a cura of no. Mas bien ta sinti cu Gobierno hunto cu DVG den forma sistematico ta plamando panico den pueblo pa purba mantene publico na cas. Ta purba di haci esaki via Toque de Queda of awor dor di identifica hende como positivo enbes di negativo.
“Minister Dangui Oduber, no cuminsa exigi di pueblo, nos ta haciendo nos best, pero Boso como Gobierno y DVG mester drecha maneho. En bes di boet pueblo, miho boso boet e trahadonan di DVG pa ta haci eror y ta mescla informacion medico priva di hende manera nada no a pasa”, asina e ciudadano a termina bisando.
