Durante di conferencia di prensa di AVP, parlamentario Marlon Sneek a splica cu kier a coregi algo cu a bay rond caminda cu tur lider di fraccion lo a bay di acuerdo cu un carta cu a sali den direccion di sr. Nelson Andrade. Manera tur hende por a sigui diabierna, parlamento di Aruba tabata tin un senioren convent, caminda cu den e reunion aki, e tema tabata Speed Andrade. Parlamento di Aruba a dicidi di bay tin un reunion pa bay papia di un miembro di prensa. Tin cu bisa cu fraccion di AVP ta lamenta esaki y a expresa tambe den e reunion cu tabata, caminda cu a trece padilanti cu den concepto di AVP, parlamento di Aruba a manda un carta pa sr. Andrade, bisando cu nan no kier pa e haci, den e caso aki entrevista den e sala di parlamento, si e no ta compaña pa un miembro di parlamento. Segun Sneek, si ta e punto ey, Parlamento di Aruba a make su point, pa medio di su presidente, cu a trece e punto padilanti. E mesun punto aki, segun Sneek, cu cada miembro di prensa tin un forma peculiar pa trece nan noticia dilanti y pa haci’e interesante, pa nan siguidonan sigui esaki.
Por a mira durante temporada di campaña un cantidad di hende a haci diferente grabacion den sala di parlamento. Tabata tin cu hasta a saca potret y cu hopi hende no a aprecia e potretnan aki. Pero ningun dia no a mira nan haya un carta. Pero awor aki, un presentacion di un noticia a wordo haci, ningun caminda por a mira cu a insulta ningun hende den e entrevista cu a tuma luga den sala di parlamento. Ningun caminda no por a wak cu a uza palabranan insolente. E carta cu a sali mes, pa Sneek, y a bisa nan tambe, cu ta algo normal. Cada miembro di prensa ta busca e forma cu nan ta kere cu ta e miho manera pa hala atencion di nan audiencia, nan ta uz’e. Pero presidente a dicidi saca un carta y manda esey y por a tuma nota cu un otro carta mas a sali despues di senioren convent, caminda sigur fraccion di AVP, ta respeta libertad di prensa.
Por corda con prensa a lastra e parlamentarionan y presidente di parlamento tempo cu AVP tabata den Gobierno. Por corda e nombernan insolente entre otro un Melvin Tromp, e corant p’ariba na Santa Cruz y e radio eynan no tabata yam’e Melvin Tromp. Ningun dia, ningun carta no a sali for di parlamento di Aruba cu presidencia di signatura di AVP, pa bisa ningun radio of television, kico mag of no mag bisa.
A drenta un era di dictadura. A drenta un era caminda cu si bo no ta comparti opinion cumi, bo no ta conta, ta bay censurabo. Ta imposibel cu un hende ta bay na su radio of den su programa, expresa loke e kier expresa. Ta un plataforma publico. Si tin algo cu no ta di acuerdo cun’e, mester bay corte y bisa corte cu un hende lo a insultado. Ta pidie pa rectifica of loke a trece dilanti no ta berdada y mester rectifica esaki. Pero cu ta bay over cu Parlamento di Aruba kier censura prensa, e ora nos ta hopi leu for di cas. Sigur na Aruba por a mira diferente medio di comunicacion cu no ta comparti e mesun opinion cu AVP, durante cu nan tabata den Gobierno y den ningun forma a mira censura wordo implementa riba ningun miembro di prensa. Tur tabata tin e acceso na sea Gobierno of Parlamento pa por a haci nan trabao. Ta lamenta cu e coalicion aki ta scoge e rumbo aki, pa bay tuma e decision di purba di censura prensa. AVP ta lamenta esaki y sigur for di e fraccion di AVP lo ta mandando un carta, puntrando si por haya e carta aki. Fraccion di AVP hopi biaha ta pone rueda di prensa den Parlamento di Aruba y awe ta tende via medionan di comunicacion cu un miembro ta wordo censura, cu e no tin mag di drenta e edificio di parlamento mas.
Esaki ta di lamenta sigur, pasobra di fraccion di AVP, ningun hende no a haya un carta informando esaki. Atrobe, no tin un comision cu ta mas halto cu un centrale commissie. Tur tipo di decision manera esaki, mester pasa un centrale commissie y den e caso aki, e carta a sali firma pa presidente, sosteni pa partidonan di coalicion y sin pasa den e caso aki un centrale commissie, sin cu tur parlamentario por a opina riba e contenido di e carta aki. Na final di dia, ningun hende no mester lubida cu parlamento ta consisti di 21 parlamentario y no di un partido di coalicion, sino 21 parlamentario, cu mester por participa den decisionnan cu Parlamento ta tuma pa nan no tuma decision y buta nan cara na berguensa mañan, ora cu tin un caso den corte y Parlamento mester perde tipo di casonan aki, cu ta buta cara di Parlamento, cu ta e organo cu ta traha ley, ta mustra e ora cu ta manera un paar di hende cu no sa kico nan ta haci ta sinta eyden y ta saca carta pa loco, manda pa tur hende.
E caso manera cu Sneek a mira ta cana, en total dos carta a bay den direccion di sr. Andrade y 24ora.com cu ta e instancia cu e ta traha p’e. E prome carta tabata bisa cu sr. Andrade a haci un noticia den sala di parlamento y cu esaki no ta permiti y cu nan ta pidi e media cu sr. Andrade ta traha pe, pa tene cuenta cu esaki, cu no por drenta sala di parlamento y traha noticia sin cu ta compaña pa un parlamentario of un autorisacion previo pa haci esaki. Despues di esaki sr. Andrade a duna su punto di bista den su noticiero y basa riba e punto di bista aki cu el a duna su noticiero, no den sala di parlamento, e grupo di coalicion a tuma e decision cu sr. Andrade no tin mag di drenta den sala di parlamento of en todo caso, edificio di parlamento mas. Algo full for di sla, pasobra Sneek ta sigur no por bay bisa ningun hende kico of laga di bisa na su radio. Den concepto di Sneek, ta un paso demasiado leu. Si tin algo ta haya cu no tabata corecto, e caminda di cana, lo tabata corte y bisa corte cu via tal canal por a scucha ABC y no ta di acuerdo cu e cos aki of e cos aki no ta berdad. Y ta pidi pa e persona rectificia. Pero no por haci mal uzo di e hecho cu abo awe ta presidente di parlamento y cu boso ta forma un coalicion, pa bay censura un persona cu bo no ta comparti opinion cun’e. Den concepto di AVP esaki no ta corecto.
