Fraccion di AVP a haya un carta, un advies di e comision di asuntonan domestico cu a wordo trata den parlamento pa asina move e simbolo cu tin actualmente colga den parlamento, e simbolo di Shoco, pa move esey fuera di e sala di parlamento y pone e escudo di parlamento den e sala, segun parlamentario Mervin Wyatt-Ras. Ta algo cu pa fraccion di AVP, tabata un sorpresa, pero tambe e ta algo lamentabel, pasobra cu e simbolo aki ta un proceso largo cu a yega na dje. Tabata tin conceptonan di simbolo di otro fraccionnan. Despues na 2008 a continua cu e proceso aki. A bin un proposicion di e simbolo aki y dado momento, den reunion di comision central a dicidi pa manda esaki pa Hoge Raad pa duna un conseho. Gobierno a cambia, otro constelacion a bin, otro fraccionnan a dicidi e ora cu ta nombra e shoco e ora. A bin cu un concepto tambe. E shoco a bira e ora e simbolo di parlamento. Tur hende a aprob’e y e presidente e tempo ey a colg’e den e sala di parlamento, mescos cu otro pais den reino, tin nan simbolo colga den nan sala di parlamento.
Wyatt-Ras a sigui splica cu den campaña sr. Evelyn Wever-Croes, cu asina e drenta den gobierno, ta algun di e cambionan caminda e lo kita e shoco y lo mande den mondi. Esey ta locual cu el a haci y esey tambe a sinti den e reunion. Tur e argumentonan cu a wordo treci padilanti, argumento cu tur fraccion a traha na dje. Tabata un trabao di hopi aña, placa tambe el a costa, pa por tin’e y awor aki ta djis bin cambi’e. Pero a sinti den e coalicion aki, no tabata tin espacio pa discusion. E tabata un decision caba tuma door di por ta sra. Evelyn Wever-Croes, den e gobierno y a gewoon dicta nan, bisa nan cu nan tin cu bin ehecut’e den parlamento. Asina el a ilustra y lastimamente tambe e ex presidente di parlamento cu e tempo ey a colga e simbolo den parlamento, sra. Lopez-Tromp, no tabata tey na e reunion. Por imagina cu e no tabata di acuerdo pa kita e simbolo aki. Ta haya jammer, pasobra e ta den e coalicion. Nan no a tene cuenta cu su opinion. E tabata un presidente di parlamento. Esaki ta algo cu e ta un bista tambe di con Gobierno awor aki ta anda. Nan ta gewoon dicta algo y ta bin pa parlamento tambe.
Semper a tilda parlamento di ta un stempel parlement, pero esaki ta netamente un ehempel bibo di un parlamento di stempel. Un stempel parlement cu ta gewoon ehecuta loke cu gobierno bin cun’e, djis pasobra ta gobierno a bin cun’e. E no ta duna e realce na e independencia cu parlamento tin pa loke ta trata Gobierno. Pasobra Parlamento, por ta di ta liga na Gobierno, pero e tempo ey tambe, ora cu a bin cu e logo, tabata parlamento a traha na dje, parlamento a pone den su sala. Awor aki tambe a bin asina aki como un decision final. Esey lo tin cu biba cun’e. Segun Wyatt-Ras, esaki ta muestra atrobe di e forma dictatorial tambe cu tin, e forma di kita cosnan sin consulta cu otro. Di loke no gusta ta hala un banda. Ta e mesun ehempel tambe di e miembro di prensa, caminda cu pasobra uno no gusta loke el a bisa. Por ta el a bisa algo cu e presidente no a gusta, ta sak’e afo. Esey no ta e forma di actua, segun Wyatt-Ras.
E ta sigui enfatisa cu a pasa hopi cos den Parlamento, hopi di nan a wordo scrutina. Wyatt-Ras tabata un victima, varios colega di nan. Hopi cos a wordo bisa den prensa, yama nan pa hopi cos, pero tin cu respeta prensa. Naturalmente, ora cu prensa bisa cierto cosnan, un carta por tabata na su luga, no ta kere cu ta algo straño. Pero e decision eynan y cu no a bin den reunion di parlamento manera mester ta, ta for di su luga.
E simbolo, tambe ta un otro muestra, cu algo ta wordo dicidi, no kier’e y cada biaha tin cu tende, esaki ta e cambio. Esaki no ta e forma pa goberna. Pueblo, ansiosamente, esunnan cu a vota pa nan ta wardando cosnan positivo, cosnan cu ta bin cu cambio, en berdad, pa nan bienestar, esey tambe kier wak kico nan ta bin cun’e.
