Tres siman pasa coleganan na Dr. Horacio E. Oduber Hospital a start cu e prome dosis di vacunacion y awo por mira bek riba e di dos dosis cu tambe a bay exitoso. A cuminsa cu e preparacionnan un bes mas pa e di dos ronde desde siman pasa caba y a conta cu un bon cooperacion cu DVG.
Un organisacion hopi strak na unda hospital ta informa DVG cuanto persona a registra pa di dos dosis. Di otro banda hospital tin un bon comunicacion cu empleadonan, ki ora ta spera nan pa ricibi evacuna pa asina evita aglomeracion, asina Sinead Geerman, deskundige hygiene infectieprevenbtie na hospital ta conta.
E di dos shot di vacuna ta spera mesun hopi persona, esta 582 persona pa vacuna. Ainda tin algun empleado cu no por tabatey presente na e prome rond pero si ta desea di haya e prome dosis y p’esey a bin c’un lista di espera. Hospital ta haci tur su esfuerso pa nan haya e prome dosis.
Pa un momento asina grandi no lo por a logra tur esaki sin ayudo di diferente departamento na hospital manera Facilitair bedrijf, pero tambe pensionadonan, kendenan a yuda prik den e prome y di dos rond, team di botica di hospital cu a pone su empleadonan disponible pa yuda cu e vacunanan y no por keda sin menciona e empleadonan di siguridad cu tambe a yuda bon na momento di transporta e vacunanan.
Hunta di directiva di hospital kier a gradici tur hende cu a yuda haci e proyecto di vacunacion uno exitoso. Y specialmente un danki na e mpleadonan mes cu a tuma e vacuna, pa asina cuida nan mes, cuida pashentnan y cuida henter Aruba.
