Tabata pa mas of menos 9:40 pm ora cu a bati alarma pa un atraco arma na Super Clean Laundromat situa na San Barbola. Ey tres hende homber a sorprende e doño den su laundromat, cu arma di candela den man. Un di nan a dal e doño cu e arma den cabes, kita su celular for di dje y bay cu e benta di dia.
E prome patruya cu a yega na e sitio a duna discripcion di e atracadonan y a indica cu nan a scapa direccion Meiveld. Helicopter di polis a activa mesora den e area, mientras cu varios patruya a cuminsa busca pa e ladronnan.
Polisnan na e sitio a tuma dato di e doñonan di e negoshi y a repasa e material visual cu e camara di siguridad a capta di e atracadonan. Na e momento aki, mirando cu e atraco a cab’i tuma luga, cu ainda no sa exactamente cuanto placa tabatin den e caha. Pues mañan lo mester revisa un ke otro pa por saca afo cu mas exacto cuanto placa e atraco a produci.
Esaki ta di dos atraco den menos cu 24 ora di dia, indicando cu pocopoco e ola di criminalidad ta aumentando riba nos isla! Lesa bo edicion di TREMPAN mañan mainta pa un raportahe amplio riba e caso lamentabel aki.
