E tabata e prome paso den un soño cu ta birando realidad. A pone e prome piedra di e proyecto di independizacion di un grupo di cliente di Cas Sjabururi.
Directora di SVGA, Els van Holen, durante e ceremonia a splica cu e costonan di e cambernan nobo cu Cas Sjabururi ta bay construi tin un costo di mas of menos 560 mil florin. A recauda hopi fondo caba y ta agradecido na tur cu a contribui cu e fundacion. Van Holen a splica cu Cede Aruba ta un di e instancianan cu a yuda hopi. E ta esun cu mas a yuda den e proyecto aki y sin nan, nunca nan por a yega na esaki.
Tambe a haya ayudo di Hulanda. Henter comunidad tabata tin chens pa duna y a duna hopi. Tin algun persona individual cu a manda placa, y diferente hopi compania. Pero tambe tabatin donacionnan anonimo.
Un noticia hopi agradabel cu nan a haya ta cu Amsterdam Manor a priminti cu ora cu e proyecto ta cla, nan ta muebla e cambernan. “Sin e ayudonan aki, no por logra proyectonan asina. Ta haya hopi importante cu e clientenan di Cas Sjabururi tambe tin un bida cu privacidad y cu un calidad di bida pa tin nan mesun camber. E tabata un lucha pa yega na e momento aki. Pero hopi feliz cu esaki,” e directora di SVGA a bisa.
Fuera di esey tin un lista di proyecto. Semper nan ta den deliberacion cu gobierno. Mester berdad hopi mas cas. Awo den e crisis plan social, tin planea pa bin cu un Gezinsvervangend Tehuis, pa e muchanan cu no por keda nan cas. E Fundacion Ambiente Feliz tambe ta bezig cu e centro di cuido na San Nicolas pa wak si den cuadro di e crisis plan, por habri tambe e tres casnan cu ta bashi eynan.
E ora tin luga pa 20 hende mas. Ta spera cu esaki por bira un realidad pasobra e necesidad ta hopi grandi na Aruba. Mayornan ta hopi preocupa pa ora nan no t’ey mas, kico ta pasa cu nan yiu special. E necesidad berdad ta hopi grandi y ta sigui lucha pa esey.
Omaira Leysner
Cabesante di e Cas Sjabururi, Omaira Leysner, a bisa esnan presente cu a dura 14 aña pa yega na e punto cu a cuminsa realisa e proyecto aki. Prome trahando riba e proyecto, y despues tabata tin algun inconveniente, pero por fin a keda cla.
E necesidad mas grandi ta ora cu nan a traha riba e proyecto pa mehora e calidad di bida di e habitantenan y cada un por tin na mesun camber. Lamentablemente no tin subsidio pa mas cliente, segun e cabesante. Nan tin subsidio pa e cantidad di clientenan cu nan tin. Y door di esey nan a prefera di mehora nan calidad di bida, dunando nan mesun espacio.
Awor aki nan tin 12 cliente y esey no por aumenta pa aworaki, segun e cabesante. Ni ora cu nan keda cla tampoco. Awor aki tin 12, mirando cu tin 2 pa 3 den un camber. Mientras cu ora nan haya nan camber, cada un ta haya nan mesun camber. No ta bay comparti camber mas cu otro. Nan ta bay haya nan mesun privacidad e ora y bira mas independiente. Esaki ta solamente camber ya cu e baño mes nan ta comparti. Nan tin awor aki cuater camber pa cliente y awo seis camber ta bin acerca, mientras cu un otro ta bay ta un recreatiekamer.
Leysner a splica cu ainda nan ta recuri na comunidad di Aruba pa sigui yuda pa nan por caba. E plan cu nan tin ta pa maart otro aña si tur cos bay bon y keda cla cun’e.
