Temporada di Carnaval ta den ful swing caba y SMAC, e fundacion cu ta encarga cu e actividadnan di Carnaval ya caba tabata tin nan schedule cla.
Algo cu si tabata di sorpresa pa hopi, tabata e cambio di un Carnival Village pa un eleccion di reina, pa un eleccion den Renaissance Convention Center. Pero Carnaval sin sorpresa, no ta sorpresa. Diaranson, 11 di januari, un biaha mas, tabata core e rumor cu lo tin cambio un biaha mas den esaki y cu lo a cambie pa bay riba Plaza Libertador Betico Croes. Presidente di SMAC, Darren van Ommeren a splica cu pa motibo di cierto rekisitonan, di kico por, kico no por, a haci cu mester a pensa riba un otro opcion.
Ora pone den balans, ta wak unda ta scoge. Di Renaissance tabata sa caba cu akiden no tabata tin mag di uza confetti, no por trece stoel, no mag di tin smokemachine. Na principio esaki no tabata tin problema. Pero den seno di SMAC, ora cu a papia di esaki y tambe teniendo cuenta cu e publico cu ta reacciona via e participante, reina, e mayornan. Nan kier haci buya, nan kier tin nan mesun borchi, un alarma. Esey a haci cu a dicidi cu, poniendo tur cos den balansa, ta move e eleccion riba Plaza Betico Croes. Esey a keda dicidi diamars anochi.
Eleccion di Reina Infantil y Hubenil, cual eleccion lo tuma luga riba diasabra 21 di januari proximo y ta cuminsa 7:00pm. Motibo ta pa e muchanan no keda lanta mucho laat. Entrada lo ta 20 florin pa hende grandi y 10 florin pa mucha.
