Diamars dia 16 di april 2024 a surgi un candela den motor RECIP #7 den planta di energia di WEB. No tabatin heridonan y e situacion di produccion di coriente pa awor ta bou di control, pero ainda delicado. E candela ta ocasiona pa un fayo di un pomp di combustibel di presion halto na un cilinder di e motor, cu a lek combustibel.
E personal na warda di WEB a detecta e candela y mesora a bati alarma. WET, e team di emergencia di WEB a acudi inmediatamente pa e prome asistencia. Na mes momento a yama Brandweer cu a yega na e sitio den “no time”.
E candela lo tabata dificil pa preveni, door cu tabata un fayo repentino di e pomp di combustibel di presion halto cu a cambia algun dia atras pa un pomp cu a bin nobo di fabrica. A pidi un team di fabricante Wärtsilä pa haci un evaluacion di e daño y pa traha riba un “recovery plan”. Motor RECIP #7 pa awor ta for di servicio y ta calcula cu lo tuma mas o menos 6 luna pa e ta bek den operacion.
E suministro di coriente actual ta delicado caba door di e aumento enorme di demanda pa coriente cu a subi considerablemente e ultimo aña. Ademas, ta drentando temporada di calor y e periodo di piek di uzo di coriente; Esaki ta haci cu e situacion por bira critico. E team di WEB Aruba ta haci su maximo esfuerso pa maneha e produccion y suministro di coriente miho posibel, pa asina por satisface e demanda di comunidad pa coriente.
Gerencia di WEB ta manda un palabra grandi di gradicimento pa tur empleado cu a haci nan maximo esfuerso pa maneha e candela asina rapido. Tambe un palabra di danki ta bay pa Brandweer Aruba.
