E pasenshi di e trahadonan di Cuerpo di Duana a caba cu e situacion reinante den edificio Horizonte unda nan ta laborando, net riba Boulevard.
E luga no ta sirbi pa traha den dje. “Nos mester di un otro luga awo,” Edward Maduro, presidente di e sindicato di Duaneronan SADA, a bisa. Y a agrega cu “e luga no ta sirbi y no por sigui patch. Gobierno mester asumi su rol y bini cu un solucion temporal te ora cu haya un luga permanente.”
Inicialmente e intencion tabata pa muda pa e adres ey riba boulevard temporalmente. Nan a muda pa 2015 y awe nuebe aña despues ainda nan ta e mesun luga, pero den un situacion nada agradabel.
Con e accion aki lo sigui, ta keda den man di miembronan. Nan ta spera si di haya atencion di e minister concerni y gobierno di kico nan lo bay haci. Nan kier un palabra fiho ki dia nan ta muda pa un otro luga, pasobra a drecha e airconan varios biaha caba y nan ta sigui daña.
Dos biaha mester a manda dos piso completo cas pa motibo di e holo insoportabel cu ta bini di wc, cual ta un problema di semper. Den oranan di merdia no por traha debi na e calor insoportabel. E walkout di mainta tabata programa pa dos ora largo.
