Comportacion di pago en general ta bon, segun Luis Oduber, CEO y director di WEB Aruba NV. Si tin clientenan cu ta ripiti y ta scoge pa paga na ultimo momento. No sa e situacion di cada persona, pero e pago en general ta bayendo bon. Tin un grupo cu semper ta cay atras y nan ta bin WEB pa haci un areglo di pago.
Motibo principal di esey ta cu na December ultimo, WEB a tuma e decision of no a desconecta ningun cliente. Kiermen esey a haci cu hopi cliente no a paga nan cuenta di December, sino ta bin pag’e awor aki. Naturalmente e suma ta subi pa e clientenan mes. E peso ta bira mas grandi.
Situacion financiero di WEB ta stabil. Ta creando reservanan pa sigui inverti den garantianan di suministro di tanto awa como coriente. En general por bisa cu e cuentanan di awa ta wordo paga. Tin un grupo berdad cu no sa kico ta e motibonan cu ta presenta na WEB tur luna of cada tanto tempo pa yega na nan areglo di pago. Pero en general e pagonan ta tuma luga.
Cumplimento
WEB tambe ta cumpliendo cu su debenan tambe. E problema a wordo soluciona pa basta tempo caba. Nan ta pagando tur nan suppliernan segun contracto.
Plan di inversion
Proyectonan cu ta bay keda cla pa 2018, ta e parke solar na Lago Heights. E proyecto di IGMS (Intelligent Generation Management System) tambe lo keda cla pa e aña aki. Tambe e parti di almacenahe (flywheel) lo keda cla pa mita di e aña. Tin baterianan tambe di 1 Megawatt cu ta instalando cu tambe lo keda cla den e prome mita di e aña aki. Tambe tin un proyecto di upgrading di e sistema di computacion lo keda cla. A instala full un netwerk nobo di computer, di internet den WEB y tambe a cumpra un datacenter, datawarehouse cu tambe a yega na fin di 2017. E siguiente siman cu ta bin lo bay wordo poni na su luga y tur e parti di instalacionnan lo cuminsa, cu tambe lo keda cla e aña aki.
Tin algun otro proyecto mas riba e planta di awa, riba e sistema di pomp awa pa cooling di nan generadornan cu tambe a pone na sistemanan cu ta hopi aña bieu, cu ta birando obsoleto, y cu ta consumi hopi energia.
Di parti di distribucion di awa tin un proyecto grandi cu a cuminsa na fin di aña pasa, cu ta un liña cu ta bay core for di aeropuerto. E ta bay sigui e trayectoria di Avenida Watty Vos y esey lo bay conecta bek riba e liña grandi cu WEB tin banda di rotonde dilanti di exAPA. E intencion ta pa bay elimina e tanki cu tin riba tereno di APA awor aki pa sak’e for di servicio.
