Venezuela ta dispone riba sistemanan anti aereo avansa di produccion Ruso cu, segun e Servicio militar y informacion (MIVD), por alcansa e espacio aeereo riba e parti Caribense di Reino Hulandes. Concretamente ta trata aki di Aruba, Corsou y Boneiro.
“E forsanan arma Venezolano tin un doctrina defensivo y por lo tanto nan no tin un proposito ofensivo. Sin embargo, e situacion instabil di e pais ta duna rason pa monitorea di cerca e situacion,” MIVD di e Ministerio di Defensa a bisa den un rapport treci p’adilanti diamars. MIVD ta yama e situacion na Venezuela “hopi preocupante”. Den e rapport, e reporte anual di 2018, tin un capitulo apart riba Latino America y Caribe.
“E pais (Venezuela) ta sufri un combinacion di crisis politico y socioeconomico riba gran escala. Na 2018, e situacion economico y di siguridad na Venezuela a deteriora ainda mas y e democracia a cay mas atras ainda.”
Presidente Nicolas Maduro ainda tabata tin sosten internacional di varios pais, entre otro e Federacion Ruso y China. A cambio di suministronan di arma, prestamo y bienes, e paisnan aki a adkiri interesnan importante den e economia Venezolano den e ultimo añanan, specialmente den e sector petrolero.
“Como señal di bon relacion cu Venezuela, e Federacion Ruso a manda dos bombardero strategico pa Venezuela na fin di 2018.”
Riba un potret den e informe anual cu un avion di combate, MIVD a afirma ademas, cu e Federacion di Rusia ta realisa regularmente buelonan di aviacion di largo alcance (LRA). bombarderonan strategico di e tipo TU-160 Blackjack, ta wordo uza pa esaki. E avionnan aki ta bula regularmente riba Atlantico y Noordzee, pero tambe a bishita Venezuela na 2018. “E bomberderonan strategico ta e expresion mas visibel di muestra di poder (nuclear) Ruso,” e informe ta bisa.
Forsanan Aereo Ruso ta practica hunto cu unidadnan di forsanan arma Venezolano den e pais aki. MIVD a bisa: “E presencia militar aki a subraya e apoyo politico y economico di Kremlin na e regimen di Maduro.”
Hunto cu AIVD (Algemene Inlichtingen- en Veiligheidsdienst), MIVD ta investiga e crisis politico y socioecnomico na Venezuela y e posibel impacto riba Reino.
Den un ekipo conhunto (Team Caribisch Gebied), MIVD y AIVD ta recompila informacion riba Caribe y Sur America, como apoyo di e politica exterior y di defensa di Reino di Hulanda.
“Ta pesey e servicionan ta siguiendo e desaroyonan cu por influi den e siguridad y interesnan stranhero di Reino y e presencia militar Hulandes den e partinan di Reino den Caribe. E situacion na Venezuela ta hopi preocupante.” Ademas di China y Rusia, Turkia tambe a fortalece su lasonan cu Venezuela.
Como resultado di e crisis economico y e hiperinflacion, e poblacion Venezolano ta luchando cu un escases di necesidadnan basico y un situacion di saludy siguridad hopi pober. “Mientrasa tanto, miyones di Venezolano a bandona nan pais. E mayoria di nan a bay paisnan di e region, incluyendo e partinan Caribeño di Reino.”
Segun MIVD, ta spera cu Venezuela ta sigui ta un fuente di instabilidad den e region” pa e otro aña. “E situacion instabil tin un efecto negativo den e situacion di siguridad regional, debi na e posibel efectonan di e radiacion, MIVD y AIVD ta sigui di cerca e desaroyonan.”
Ta spera mas refugiado
“Na Corsou y tambe na Aruba, bao di e espacio aereo unda cu e sistemanan antiaereo di fabricacion Ruso di Maduro por yega facilmente, Stef Blok ta di bishita den e resto di Reino,” Sheila Sitalsing, redactora di diaspora Antiano, a skirbi den su columna den Volkskrant.
Un guera civil na Venezuela ta nifica, segun e columna, mas refugiado, riba e exodo cu ya caba ta wordo yama “e crisis di refugiado mas grandi di e historia di Latino America. “Nan ta bin tambe na Corsou y Aruba, caminda cu nan ta wordo trata manera bestia, y Stef Blok ta para mira, den nomber di e gabinete.” Pasobra Hulanda si ta reconoce Juan Guaido, pero ta nenga di carga su co-responsabilidad pa e consecuencianan di esaki, door di yuda ricibi e refugiadonan adecuadamente di un regimen aparantemente reprobabel. Sitalsing ta skirbi riba esaki den parti como respuesta na e imagennan cu huma, candela, sanger y mokete cera di Guaido, soldanan cu a boltia of no y e confusion for di Venezuela.
“E retador Juan Guaido cu ta sigui preocupa pa e base di poder di Maduro y cu mientras tanto tin tanto expectativa diferente riba e restod i mundo riba su schoudernan cu pronto, si e por haci’e, solamente lo decepciona.”
E “loco di Donald Trump”, e columna ta sigui, cu te aowr aki a purba di forsa e “cambio di regimen” mediante Tweet, pero no ta cansa di enfatisa cu ‘tur e opcionnan ta riba mesa” pa expulsa Maduro di Miraflores, incluyendo un posibel invasion den un pais cu ta dos biaha mas grandi cu Irak, cu ta alberga 33 miyon di persona, tin un ehercito di 130 mil y tambe tin colectivonan paramilitar, como tambe bandanan criminal bon organisa y arma.
“E intento nobo di lantamento cu a cuminsa diamars mainta, ta nada menos cu “un golpi di estado cu apoyo directo di Washingtion,” fielnan di Maduro a keha. Nan tentaculo ta yega te cu Moscu, Ankara y Havana. Despues Washington, atrabes di e Asesor di Siguridad naciona, John Bolton, a bisa cu no tabata un golpi di estado, “sino un intento di e presidente legitimo Guaido di tuma e control.”
E homber mas fuerte di Brazil, Bolsonaro a uni sin reserva: Venezuela ta e pais “manteni den cautiverio pa un dictador.” Bo por recore un caminda largo cu e amigonan aki, pa cual esaki por dura hopi tempo.”
