Maneho di Husticia pa loke ta KIA ta un desaster. Pa basta tempo tin kehonan cu hasta a conduci na candelanan den prison atrobe y basta daño a tuma lugar. Ademas di esey e personal ta full demotiva pasobra gobierno a haya cos cla pa ehecuta pa loke ta e trahadornan y ta para tur cos.
Reorganizacion ta un di e puntonan. Ora cu e gobierno di AVP a bay a laga un plan cla pa ehecuta. A traha basta tempo riba dje. Algun punto chikito tabata falta. Awe por mira cu e mandatario actual a para tur cos y despues di mas cu un aña di gobernacion mas bien a lubida riba prison.
Papia bunita den conferencia ta bon pa consumo publico local. Esnan cu ta traha den KIA ta biba cu e realidad. Despues di basta warda a dicidi cu ta bay cuminsa reuni pafo di KIA pa asina fiha e siguiente paso. KIA ta un barco sin capitan desde cu e gobierno aki a cuminsa goberna.
No tin un plan di maneho. E minister cu den opocision tabata e sabio di husticia, awe gobernando no ta cumpli cu loke tanto el a priminti. Pesey na KIA e trahadornan ta demotiva y ta trahando bou hopi presion. E sindicatonan SEPPA y TOPA segun informacion di e trahadornan ta na altura di tur cos.
Ora cu gobierno a sinti e presion a core busca reunion y asina evita un protesta diamars mainta 23 di April. Un reunion pafo di KIA por conduci na un protesta si no haya un splicacion cu por convence e trahadornan. E shopsteward cu sindicato a sinta cu e mandatario.
A haya full un splicacion di loke tabata pasando. E minister a priminti cu e reorganizacion lo keda cla pronto. Ta cosnan cu ta andando varios aña caba pero cada cambio di gobierno cos ta pega. Pesey ora a kere cu e tabata cla, e gobierno a drenta wanta cos.
Cu e reunion y mensahe por escrito di e shopsteward pa e trahadornan a evita un protesta. Tabata ora cu a tende kico tin na caminda e minister a core duna atencion. Lo duna e minister algun luna di beneficio di duda y si esaki no keda cla lo nifica walkout manera e trahadornan demotiva a splica.
