Awe mainta Aruba henter por a presencia e firmamento di e acuerdo entre Aruba y Hulanda, caminda cu nos pais lo haya e di tres tranche pa loke ta trata e ayudo financierto den cuadro di e crisis di COVID-19.
Den cuadro di esaki, a haci varios pregunta durante e rueda di prensa y un di nan ta e solidaridad cu e sindicatonan di e aparato publico tin pa loke ta comunidad.
Josephine Albertus, presidente di SIMAR, den cuadro di esaki, a reacciona pa e demas sindicatonan cu hunto ta purbando di tin un “dialogo” cu gobierno.
Segun Albertus, a entrega un carta dia seis di november na prome minister, unda cu ta pidiendo un reunion pa por trece claridad pa nan miembronan.
A hasta skirbi den e carta, cu e miembronan no kier haya golpinan inespera y keda confronta cu sorpresanan di un dia pa otro.
Ningun momento a bisa cu “per direct” tur cos tin cu caba. Ningun momento a bisa cu “per direct” no lo bay keda solidario.
Tabata solidario fo’i comienso y lo keda solidario. Unico cos cu a bisa e periodo mester ta determina, Albertus a enfatisa.
Nan tabata kier haya mas claridad. Por a scucha awe cu pa 2021 ainda e “inhoudingnan” lo keda vigente. Esaki hustamente, segun e ta bisa, ta algo cu, si a haya reunion, por a tende di dje y pasa informacion aki pa e miembronan.
Nan ta haya cu e forma con a haci e expresion ta comosifuera cu sector publico no kier ta solidario mas y esey no ta berdad. A manda cuater carta, unda cu a pidi pa por haya claridad den un reunion unda cu por dialoga. Nan tin mester di e informacion di kico ta bay pasa pa informa nan miembronan.
Segun Albertus, “nos kier claridad” y a enfatisa un biaha mas, cu e sindicatonan no a bisa ningun momento cu no kier ta solidario. No a bisa ningun momento cu “per direct” mester stop cu inhoudingnan. Loke a bisa ta cu kier claridad y pa por haya claridad mester sinta na mesa, mester por dialoga.
Mescos cu Aruba ta bezig ta dialogando cu Hulanda pa lunas pa por bin na un acuerdo, pa por trece claridad. Esey ta loke cu e sindicatonan SIMAR, SPA y SADA ta pidi pa por sinta cu gobierno pa por haya claridad, pasobra e ora ey por duna informacion bek na e miembronan.
E sindicatonan tin un responsabilidad cu e miembronan, ora nan bin y haci pregunta, mester por contesta nan.
No ta bay tras di redo y ni traha storia. P’esey ta pidi un reunion. A manda carta, y esey ta loke a haci. “Ta jammer pa wak cu tur hende ta cambiando cos, ta haciendo comosifuera cu no kier ta solidario. Ningun momento no a bisa esey.”
Unabes mas por bisa pa lesa e carta cu a manda y den e carta mes por wak cu tin mas momento cu ta pidi pa por sinta na mesa pa por dialoga y pa por trece claridad.
