Arubaanse Voetbal Bond (AVB) hunto cu Fundacion Lotto pa Deporte a tene un conferencia di prensa. Aki nan a bay riba e momento cu ta uno importante pa mundo di deporte, di cual ambos partido a splica con a bay cu e negociacion di e MoU.
E partidonan a firma un Memorandum of Understanding (MoU), unda FLpD ta traspasa e maneho di Compleho Deportivo Jose “Buchi Panama” Wever pa federacion di futbol. Ing. Richard Dijkhoff, presidente di AVB, a expresa cu esaki ta un stap den e direccion cu nan a inicia un par di aña pasa, pasobra e origen di e proyecto aki a cuminsa na momento cu Lotto a dicidi di construi e compleho na Yara hunto cu AVB y FIFA.
Director di Fundacion Lotto pa Deporte, Roland Tuitt, a bisa di ta gradici di por a yega na e momento aki di firma e MoU. Nan ta contento pa dos motibo, cual e prome ta cu lo eleva nivel di sport y e di dos motibo cu Savaneta ta e bario cu Tuitt a lanta. Ora ta mira sport, kier haci tur cos posibel, p’esey FLpD ta uza tur canal pa eleva deporte. Si no tin e fondo disponibel, si tin un buraco cu por uza otro instituto manera AVB y FIFA y por logra e meta, e ora ta haci esey.
