Awe a tuma luga e referendum solicita door di empleadonan Aruba Airport Authority NV pa cambia di representacion sindical. Un total di 104 empleado a haci uzo di nan derecho di voto, di cual 93 a vota pa Sindicato FTA. Tambe Mediador di Gobierno a informa cu tabatin 3 voto invalido, 3 voto blanco y 5 empleado a vota pa no tin ningun sindicato.
Cu e resultado aki, Sindicato FTA ta logra saca Sindicato di Trahadonan Arubano (STA) for di Aeropuerto despues di hopi aña di representacion. Tabata obvio cu for di algun tempo caba e empleadonan di Aeropuerto no tabata satisfecho mas cu e atencion y sosten di nan sindicato. E hecho cu e Presidente a liga su mes politicamente dor di traha como consehero pa e mesun Minister di Labor, Glenbert Croes, a crea e percepcion di un relacion mucho estrecho cu Gobierno, cu no necesariamente ta na fabor di e clase trahado.
Pa loke ta Aeropuerto, tabatin 173 trahado cu derecho di voto, pues cu por a vota den e referendum pa por conta riba representacion sindical. Si tene cuenta cu ta 104 empleado a vota, esey ta representa solamente 60% di e trahadonan, cu no necesariamente ta refleha un resultado abrumador. Te haya e impresion cu sindicalismo no a laga un bon impresion atras entre e empleadonan na Aeropuerto, pasobra como 40% no a ni bay vota mes, pues ni pa esun y ni pa e otro. Probablemente e bruhamento di tera ente STA y FTA mes por a percura pa e resultado aki.
Di acuerdo cu reglanan impone dor di Mediador di Gobierno, si Sindicato FTA logra 87 voto na fabor, ya caba el a gana y mesora por cuminsa representa e empleadonan di e compania priva, di cual Gobierno ta 100% doño. Entretanto FTA tin no menos cu 98 miembro nobo na AAA, pues trahadonan cu a afilia na FTA prome cu nan a gana e referendum mes! Si tene cuenta cu a logra 93 voto awe, kiermen cu tin 5 miembro cu a afilia na FTA pero cu na caminda a kita nan sosten of a opta pa no bay vota pa FTA den e referendum awe.
“Nos ta felicita e empleadonan A.A.A. N.V. y alabes gradici nan pa e confiansa cu nan a pone den nos sindicato pa defende nan den nan asuntonan laboral. Union ta haci forsa”, asina e sindicato a publica un rato pasa riba nan pagina di Facebook.
