Hubert Dirksz a haci un bishita na Consul di Venezuela. Na nivel di Latino America, di Alternativa Democratico Sindical, cu ta e centro sindical di America cu FTA ta afilia na dje, a tuma un decision algun siman pasa, cu na tur pais, caminda cu tin afiliacion na e sindicato aki, lo haci un protesta, riba e dia di awe, na embahada of consuladonan riba e situacion cu tin na Venezuela.
E situacion precario, e situacion caminda cu e sindicatonan ta denuncia na mundo kico ta e situacion na Venezuela y e falta di respet cu tin, e violacion di leynan y principalmente e posicion anti democratico caminda cu e situacion di trahadonan tin ta decayendo cada dia. Miyones di hende saliendo. Na Colombia so tin 300 mil hende cu a sali bay eynan. Hendenan studia y hobennan, cu a nace eynan, cu awor aki ta mustra cu nan no tin futuro na nan pais y tin cu sali, bay lucha, biba pa menos. Malesanan manera tuberculosis, difteria, un cantidad di situacion cu ta biniendo padilanti y no tin remedi y nan no ta wordo atendi. Abandono, responsabilidad di Gobierno pa e scol di muchanan. Un canasta basico, bo mester tin 14 salario, un salario di 17 dollar, pa por cumpra un canasta basico. Ta increibel e situacion na Venezuela, caminda persecucion di hende, nan ta wordo hiba na prizon, un situacion hopi lamentabel, no solamente di violacion di democracia, violacion primeramente di derechonan humano, caminda e salud di hende ta bayendo atras drasticamente. Pobresa extremo, hendenan ta fayece pa motibo di falta di atencion di dokter.
Un cantidad di situacion no corecto, no na su luga, cu ta wordo cometi pa e gobierno cu ta haciendo malo y siendo un malhechor y no ta para pa su responsabilidad. Tur esaki a wordo denuncia na nivel internacional. Di parti di ILO, a haci yamada na Venezuela, sin ningun contesta y ta kere y ta poniendo e presion aki na nivel di America Latina completo, pa forsa un atencion pa e pueblo sali for di e situacion aki. E ta un situacion critico y lamentabel.
Atencion
Segun Hubert Dirksz, e posicion aki e gobierno di Venezuela ta tumando, pero tin protestanan ta tumando luga na Colombia. Tin protesta aki paar di dia na Brazil. Tin protesta na diferente estado di diferente pais, diferente embahada di henter e region. E carta cu a entrega, cu ta un carta comun cu tur e puntonan di preocupacion tin cu wordo entrega na tur embahada. Actualmente tin e presidente di e Central Sindical di America Latina, ta na Merca, combersando cu e representante di e Gobierno di Merca pa wak kico ta pasa y representantenan di e Organisacion di Estadonan Americano tambe. E idea ta pa duna mas respet pa e trahado. Tin un desempleo increibelmente grandi na Venezuela. Tin un caida
di un situacion decente di biba increibel. Pesey FTA, conhuntamente cu tur e otro sindicatonan na America Latina, a dicidi pa lanta para y pa haci esaki.
Carta
Esaki a pasa door cu e ta poco riba man. Na Aruba mes FTA no a alcansa pa reuni y protesta awe. Pero e contacto ta keda cu e delegadonan di e sindicato FTA y tambe cu relacion cu e organisacion di Venezolanonan na Aruba, pa nan haci un protesta pa demostra aki na e consulado cu e situacion aki no por sigui y sigur Aruba, mescos cu Corsou, Boneiro, tur ta sinti e consecuencianan di e situacion na Venezuela tambe.
Accion di protesta
Por haci un accion di protesta. E por tuma luga, pero tin cu papia riba dje, segun Hubert Dirksz.
