Sindicato di Aruba hunto cu e sindicato di polis di Corsou a tene reunion cu gobierno, unda nan a trece dilanti diferente punto. Un topico cu no a atende cu ne tabata e 12.6%, pero riba e trahamento hunto y yega na un solucion riba e problematica cu tin.
Rolando Maduro, vice-presidente di sindicato SPA, a informa cu sindicato di polis y duana di Corsou ta di bishita y nan a tene un reunion fructifero cu minister di Husticia Rocco Tjon. Aki nan a por a intercambia, dialoga y papia riba cierto topico interesante cu ta andando aworaki.
Presidente di SPA, Rodney Solognier, a splica cu e sindicalistanan di Corsou kier a cera conoci cu minister di Husticia Rocco Tjon. Tambe a trece dilanti e problematica cu nan ta pasando aden. E sindicalista ta haya cu e reunion a bay hopi bon y ta mira cu ta bay tin mas colaboracion den futuro entre e sindicatonan y ministerio. Durante e reunion aki no a papia riba e 12.6%, pero a bay mas riba e topico di conexion cu ta bay tin den futuro cu e sindicatonan di ex-Antias en general. Aki el a referi riba e trahamento hunto como yega na e solucionnan cu mester pa e problematica cu nan tin.
Riba e hecho cu tin un kortgeding contra SPA, esey no a kita pa nan sinta cu e mandatario. Segun Solognier, nan ta anfitrion dje bishitantenan. Riba peticion dje sindicalistanan di Corsou a pidi reunion cu Tjon pa trece nan idea y preocupacion cu nan tin pa nan isla. Tambe nan kier a mira con aki ta bay delibera riba e problematicanan. Pa loke ta e kortgeding cu tin di tuma luga mañan, segun Maduro, esaki no ta sigui. Pero e ta sigui otro siman diamars pa 8:30 am conhuntamente cu SADA.
Amado Vilchez, presidente di Sindikato Ambtenaren di Polis i Kadena Hudisial (SAP), a splica cu e bishita ta basa cu e relacion di trabou estrecho cu nan tin cu sindicato SPA. Aki SAP a bin cu mas otro sindicato di Corsou. Pa loke ta e reunion mes el a splica cu esaki a bay a base di dia 24 di februari tabatin un Justitieel Vierlanden Overleg (JVO). Aki tur pais a participa na dje y den cuadro di esey por mira claramente con estrecha y intensifica e cooperacion, haci e trabounan mas estrecho. Den cuadro di esey ta loke hustamente e sindicatonan di Aruba, Corsou y St. Maarten ta hiba di pensamento. P’esey nan a bin pa papia cu e titular di husticia, esta Tjon, pa mira cu e tambe ta biba e mesun pensamento cu e sindicatonan.
George Hernandez, presidente di Sindicato di Algemene Bond van Overheids en overige personeel (ABVO), a informa cu nan a yega diaranson y a delibera riba diferente punto. Den ora di atardi a sinta cu minister di Husticia y a papia riba diferente tema cu ta comun. Segun e sindicalista, por bisa cu por yega na cierto acuerdo. Importante di e reunion tabata e JVO, caminda e cuater paisnan ta sinta hunto y ta trata diferente tema riba e parti hudicial.
E paisnan cu a pasa den e pandemia, unda tabatin situacion hopi dificil, caminda cu Aruba tin e 12.6% cu mester a entrega pa haya e likides y Corsou tin e parti di 12.5%. Diferencia ta cu aki na Aruba a bay directamente riba e salario di e trahado. ABVO ta di pensamento cu eynan a frenta e forsa di compra di un trahado, caminda e tin di sigui traha su ocho ora, pero ta bah’e riba su forsa di compra. Di baha e salario a mishi cu e pensioen. E sindicatonan a bisa e tema cu tin di atende ta ki dia ta recupera bek loke a entrega.
Thais Isidora, presidente di Nationaal Algemene Politie Bond (NAPB), a splica cu diaranson nan a reuni cu e sindicatonan di Aruba. Aki nan a brainstorm riba diferente punto y cierto strategia cu nan lo bay haci. El a dirigi su mes na tur ambtenaar di Aruba como di Corsou pa ta pendiente e luna aki, pasobra lo por mira cu ta bay bin cambio p’e parti sindicalista. Pa loke ta e situacion financiero el a expresa cu ainda ta den e pandemia cu ta uno mundial. Tur hende mester custumbra, tur polis y ambtenaar ta sali di nan cas pa labora cual ta un obligacion, deber pa cobra fin di luna. A papia cu diferente sindicato aki y e luna aki tur por verwacht cu nan ta bay bin cu algun cos.
Juan Lourens, presidente di Sindikato Trahadornan di Aduana i Fiskalia (STrAF), ta kere cu nan no ta laat, sindicalismo mester bisti su sapatonan aworaki y sali debidamente na vanguardia. Nan ta aki pa yuda enforsa e lasonan di trabou cu tin cu e coleganan sindical. E intencion ta pa St. Maarten tambe y sali como un bloke pronto den futuro. Y aki mustra e manera cu a bin ta impone cu cosnan cu Hulanda a bisa riba e clase trahado no ta aceptabel mas.
Pa mas lesa TREMPAN.COM.
