Siman pasa Biblioteca Nacional Aruba a organisa su di 7 simposio consecutivo, e biaha aki a trata matanan local y medicinal. Esaki ta di 2 aña cu Guerero ta presenta pa duna un tayer, haciendo uzo di boternan di plastic pa traha artenan recicla. Emelia Semeleer director interino di Biblioteca Nacional Aruba a indica cu 35 mucha a participa den e tayer di 1 siman. Tabatin hopi interes y e muchanan tabata contento di tur loke nan a produci e siman aki.
E idea ta pa sigui organisa simposio. Tambe tin idea pa organisa tayer. Tur siman biblioteca tin un actividad pa mucha merdia y ta pone esaki tur siman riba facebook unda ta invita un autor di Aruba pa presenta un charla. E siman aki tabatin un mondhigienist y otro siman tin Emerita cu un popchi. Ta organisa algo p’e muchanan 1 bes pa siman, asina Semeleer a bisa.
Ronny Alders ta e organisado e di 7 simposio sostenibilidad di biblioteca. E simposio di sostenibilidad di Biblioteca Nacional Aruba tabata enfoca riba studiantenan di scolnan secundario y educacion avansa. A scoge e tema matanan medicinal y local, unda diferente scol di Oranjestad y pariba di brug a bishita biblioteca 1 siman largo.
E studiantenan a haya lectura di oradornan invita di Aruba y Corsou, manera Dina Veeris di Corsou, Olinda Rasmijn di StimAruba, Judy Boekhoudt, Siro Marquez, Igor Croes y Didi Tromp di Aruba. Pueblo di Aruba por a haya informacion di e tema aki di e oradornan na Cas di Cultura.
Diabierna e muchanan a ricibi un tayer for di artista y pintor William Marquez-Guerrero di Colombia. Pa henter 1 siman el a duna tayer na studiantenan di 6-17 aña, unda nan a traha artesania cu materialnan recicla. Nan a traha cu boter di plastic y esaki ta un regalo di Biblioteca Nacional Aruba pa engrandece arte y cultura di Aruba, Alders a bisa.
William Marquez-Guerrero a bisa cu na Colombia nan tin e proyecto via reciclahe. E aña a realisa un trabou cu plastic PET, cual ta un plastic cu ta contaminando e planeta. Ta uza plastic PET pa awa of juice, pero cu e plastic aki nan ta siña e muchanan traha artesania y elementonan pa uza. E tabata contento di mira e creatividad impresionante di e hobennan di Aruba. Ta importante pa mantene muchanan informa riba reciclahe, pasobra asina lo mantene medio ambiente sano p’e futuro generacion.
Jolly Flores di Cacique Macuarima School tabata contento di por a presencia e actividad di simposio. El a siña hopi manera ora di uza plastic no mester bente afo, pero por uz’e pa otro cosnan tambe. El a traha un flor cu e boter di plastic y a haya esaki hopi leuk. El a mira cu otro muchanan tambe a traha cosnan leuk.
