Minister di Enseñansa y Deporte, Endy Croes awe diadomingo a invita Sidney Ponson Charity Foundation pa reuni entre otro pa intercambia pensamento riba e proyecto grandi na Bubali cu e fundacion tin pa nos deportistanan. Tambe a elabora riba e Wahoo Shootout cu lo tuma luga dia 4 di december 2021. Sidney Ponson Charity Foundation ta contento cu e mandatario a mustra su gratitud y sosten pa yuda cu e evento y otro proyectonan na caminda.
Tambe e mandatario a intercambia idea y pensamento pa futuro riba con Sidney Ponson Charity Foundation y Ministerio di Deporte por traha hunto na bienestar di deporte den su totalidad.
E reunion a bay den un bon ambiente, unda cu e mandatario a enfatisa riba su vision pa deporte di Aruba y tambe e conocido pelotero Sidney Ponson a comparti su plannan cu e tin pa yuda desaroyo di deporte na Aruba.
Ambos ta mas cu dispuesto pa traha hunto pa un solo meta, deporte di Aruba y nos deportistanan hoben. Pa nan por sigui riba e bon caminda, pa nan practica deporte, pa motiva nan y yuda nan sigui crece y desaroya den bida.
Sidney Ponson Charity Foundation a gradici Minister Endy Croes pa a habri su portanan riba un diadomingo atardi y asina mustra cu deporte no tin dia ni ora. Tambe Sidney Ponson a gradici Milton Croes cu a join den e reunion, mustrando un biaha mas e vision pa traha hunto y cu kier mehora deporte den su totalidad na Aruba.