Luna di october ta luna di concientisacion pa cu cancer di pecho Stela Vrolijk, representante di Mary Joan Foundation a comenta cu un miembro di e fundacion a acerc’e pa por recauda fondo p’e fundacion.
E bikernan di Shoco Legends Aruba y Rosa van der Biezen lo ta encarga pa por recauda fondo pa Mary Joan Foundation. Vrolijk a comenta cu nan ta masha agradecido, pasobra ‘cada granito ta conta’. E aña aki ni tampoco aña pasa tabata posibel pa haci e collect ni e caminata. Cu man habri nan ta tuma cualkier ayudo.
Rosa van der Biezen ta cliente di Mary Joan y t’e mes tabata esun di e idea pa recauda fondo. El a describi e evento como un ‘soño’. Esaki ta un proyecto cu el a pensa hopi riba dje. Rosa a gradici tur persona cu ta haciendo e proyecto aki posibel
Andre Geerman, ta vice-presidente di Shoco a cuminsa na gradici tur e ‘biker friends’. Shoco Legends ta un club di biker, cu ta ride manera un famia pa gosa y pa crea memorianan. E ride lo sali for di Carnival Village y lo ta dia 7 di november. No lo tin stop p’asina evita aglomeracion. E ride lo termina na e oficina di Mary Joan Foundation situa na Sabana Blanco 8. Si un biker por core cu un survivor, nan lo aprecia esaki. E inscripcion lo tuma luga di forma digital. E prijs ta 25,- florin pa persona. Ta pidi tur biker pa dorna nan brommer na ros, lo tin premio pa saca premio pa esun mas dorna. Tur brommer, scooter of quard ta bonbini. Inscripcion ta cera dia 5 di november.
Pa motibo di pandemia, Mary Joan no por a haci ningun evento pues no por a recauda fondo. A enfoca riba luna di october pero ta henter aña nan ta traha. E aña aki a organisa dos caminata, diadomingo awo lo tin kayak. E kayak lo sali fo’i Mangel Halto bay te rif, keda cuater ora y despues bin bek tera. Dia 30 di october lo tin e ‘Mercado di Salud’, esaki lo sosode na Club Kibrahacha di 9:00 am pa 2:00 pm. Na e Mercado di Salud lo tin mas cu un partner pa duna informacion tocante di salud.
PANDEMIA
E pandemia a causa cu mester a haci algun recorte. Un di e portanan cu mester a cera ta cu persona no por a traha e siman completo sino mas bien 3 dia pa siman 10:00 am pa 2:00 pm. Ta buscando sponsor pa por duna e clientenan experiencia agradabel y saca nan for di cas.
MARY JOAN FOUNDATION
A funda Mary Joan Foundation na aña 2007 na memoria di Mary Joan Geerman. A diagnostic’e cu cancer di pecho na 1994, e tabatin 32 aña. Durante su enfermedad, Mary Joan y algun amistad a dicidi di lanta un grupo di apoyo pa yuda otro den necesidad. Nan a haci un compromiso pa yuda otro hende muhe y tambe hende homber pasando den e lucha pero tambe pa yuda e famianan. Tambe pa educa comunidad tocante cancer di pecho y dicon ta importante pa detecta esaki na tempo. Pa mas informacion por bishita www.maryjoanaruba.com
