Riba 15 di December 2020, un total di 100 persona a huramenta of haci promesa den presencia di Gobernador di Aruba Alfonso Boekhoudt, den cuadro di e ceremonia di naturalisacion.
Participacion na e ceremonia di naturalisacion ta e ultimo parti di un proceso largo cu ta conduci na obtene e nacionalidad Hulandes. Durante e ceremonia a para keto na e echo cu 15 di december ta tanto Dia di Reino como Dia di Naturalisacion.
Gobernador a para keto na e nificacion di e nacionalidad Hulandes, e derecho y obligacionnan cu e ciudadania Hulandes ta hiba cu ne y a presta atencion na e conexion cu e sociedad di Aruba.
E procedura pa haya nacionalidad Hulandes via opcion of naturalisacion ta describi den “Rijkswet op het Nederlanderschap”. Por haya mas informacion riba www.rijksoverheid.nl/onderwerpen/nederlandse-nationaliteit/nederlander-worden.
E trayectorio ta cana segun e decreto “Verkrijging en Verlies Nederlanderschap”, poniendo den practica articulonan 21 y 23 di “Rijkswet op het Nederlanderschap”. Pa mas informacion tocante e procedura na Aruba, tambe por tira un bista riba e website di Gabinete di Gobernador di Aruba: www.kabga.aw
