Mediador di Gobierno cu man yen despues di maart

Analisando e situacion di aña, Mediador di Gobierno ta constata cu despues di maart e oficina a haya su mes cu cantidad di caso pa atende. Y esaki no solamente via di sindicatonan, pero tambe trahadonan cu no ta organisa, a mira Mediador di Gobierno como unico cu por yuda nan.

Esnan no organisa tabata principalmente riba decisionnan unilateral cu doñonan di trabou a tuma. Esaki Anselmo Pontilius a conta 24ora.com

Na momento cu Aruba a bay den lockdown, den luna di maart, hopi dunado di trabou a interpreta e situacion aki na nan forma, esta cu nan no tabatin obligacion pa paga salario na trahadonan. Nan a uza e frase “si no tin trabou, no tin salario”. “A lubida cu tin leynan laboral na nos pais, y no por pone e leynan aki un banda pa motibo di e crisis. Esey a crea hopi confusion.”

Mediador di Gobierno cu man yen despues di maart

Mediador di Gobierno cu man yen despues di maart. Click link pa mas https://24ora.news/37vKO7X

Posted by 24ora on Thursday, December 17, 2020

Den e situacion aki ta e grupo di trahadonan cu a perde trabou mesora esunnan cu mas a resalta. Esakinan a bin principalmente den sector hotelero y di restaurant, no trahando directamente cu e negoshi sino tabata den servicio di “Uitzendbureau”. E companianan mes a haya nan sin trabou. “Te ainda un gran mayoria di e grupo aki ta sin trabou. E ocupacion di hotelnan ainda ta abou. E trahadonan mes cu ta traha cu e directo cu e hotelnan a bin ta cobrando 60%. Esaki ta un drama pa hopi famia.”

E otro problema cu Mediador a hay’e cu ne ta e trahadonan cu no ta organisa den un sindicato y e dunado di trabou a ofrece nan un asina yama “pakete financiero”, cu den hopi caso tabata menos di loke ley ta prescribi.

Den casonan asina Mediador ta simplemente duna nan conseho, te unda cu por, of ta manda nan pa sindicatonan cu lo por yuda nan. Y otro gruponan cu a dicidi di busca sindicato di biaha pa representa nan den e situacion reinante. Tin referendum cu a tuma luga y tin na januari tambe.

E ta kere cu den e prome lunanan di 2021 Aruba lo no tin e barconan di turista di semper y tampoco ocupacion di hotelnan ta manera antes. Esaki tin efecto sigur p’e trahadonan y esnan cu ta duna servicio na turismo di crucero y e sector cu ta depende di e turista aki. “Como pais nos tin e tarea pa menos compania bay den crisis, cu nan no por cumpli cu nan obligacionnan, y mantene mas cupo di trabou posibel. E crisis ta grandi, pero nos pais tin leynan.”