Ayera atardi a yega e di dos parti di delegacion di e parlamentarionan di Aruba for di Hulanda. Miguel Mansur ta lider di fraccion di ACCION21, na su yegada el a cuestiona e hecho cu; Setty Yarzagaray di MEP no tabata parti di e delegacion di MEP pero toch a haci uzo di e servicionan, entre otro VIP Room na Schiphol. Mansur a indica bisando cu; e lo percura pa Setty Yarzagaray paga tur e servicionan cu el a uza mirando cu e no tabata parti di e delegacion.
Awe, a haya e di dos banda di medaya. Yarazagaray a contesta bisando cu; ta e mes a paga su pasashi pa Hulanda. Ta dia 8 di october ultimo cu e Comision Central a dicidi cu Parlamento lo paga pa seis persona biaha pa Hulanda. E lidernan di fraccion, president di parlamento y griffier. Tur bintiun a ricibi invitacion si, segun Yarzagaray.
Como parlamentario, el a acepta e invitacion, pero mirando cu parlamento ta cubri pa seis persona so, Yarzagaray a opta pa paga su propio pasashi pa toch asisti na e congreso. Setty Yarzagaray a paga no solamente su propio pasashi, sino hotel y hasta alimentacion, pues su biahe pa Hulanda no a costa Aruba ningun cen.
E parlamentario di MEP no sa ki problema Miguel Mansur di ACCION21 tin cu ne. Adicional, Yarzagaray a informa griffier di parlamento cu e lo forma parti oficial di e delegacion. Riba e servicio di VIP, t’asina como parlamentario bo tin derecho riba dje ora bo ta biaha pa trabou.
