Pa di tres aña consecutivo Roxana Ras, hefe di Mercadeo di SETAR, a haci entrega di 100 tas di scol na Fundacion Creciendo. Esaki en conexion cu nan proyecto di Bags 2 School pa comienzo di aña escolar nobo.
Joase-Ann van der Biest, representante di Fundacion Creciendo, a conta cu e fundacion tin 7 aña hasiendo e bunita projecto aki pa yuda muchanan menos afortuna den cuadro di e Metanan di Desaroyo Sostenibel pa 2030. E 100 tas di scol nan aki lo wordo reparti pa 100 mucha na 10 diferente scol rond di Aruba.
Meta di esaki ta pa stimula y empodera nos muchanan pa bai scol y hasi nan best. SETAR durante henter aña ta contribui na comunidad cu varios actividad y proyectonan den e area di cultura, deporte, educacion, social y mucho mas. Ademas e aña aki SETAR a organisa pa prome biaha e Youth Tech Event special pa nos hobennan caminda algun scol a gana premionan grandi pa hasi proyectonan na scol. Asina aki SETAR ta duna bek na nos comunidad. SETAR ta desea tur studiante un aña escolar exitoso.
