Sergio Tjie-A-Loi ta un interprete y tambe traductor huridico, formando parti di AMAA. E tabata tey presente durante e charlanan aki. E ta comenta cu e charlanan aki ta hopi importante pasobra si bo ta bon informa e ora ey bo ta evita problema den futuro.
A trata entre otro contractnan. E mes ta traha diariamente na corte y ta mira hende bringa otro den corte, pasobra contractnan no ta bon firma of e contenido di e contractnan no ta valido.
Awendia den mundo, caminda cu tur cos ta contracto, hende mester sa cu mester tin un instancia cu tin conocemento di e materia pa por guia den esaki, pa evita problema.
Guia
E prome cos cu mester ta cu no mester firma contracto di biaha. E momento cu hopi biaha nan ta bisa cu mester e contract firma di biaha, ta conseha pa no haci esey nunca. Bo por les’e bo mes. Pero semper ta importante pa un hurista of abogado cu tin specialidad den e contract, esta e materia di e contract, sinta wak, analisa, tuma bo tempo, saca afo loke bo no kier, mand’e bek. Di e forma ey e ta bay. No core firma un contract sin cu bo sa kico e contenido ta y kico e consecuencia ta pabo huridicamente.
Encuentronan
Tjie-A-Loi a splica cu tin hende tin e pensamento cu AMAA ta un organisacion drumi. Nan ta trahando pa duna informacion na artista y musiconan. Ta importante pa mas bo ta informa, mas bo ta evita problema y mas forsa bo tin ora bo bay solicita como musico of artista, of bo haya un contracto of proposicion di cualkier organisacion. Esey ta e meta di AMAA. Duna informacion, duna forsa na hendenan comun, pero cu sa un tiki mas, sa unda nan por bay unda cu por puntra cu si tin un contract, por haci’e di e forma ey, pa evita problema. Esey ta e rason di mas importante den esaki. Evita cu bo ta bay corte pa bo bay bringa, perde bo placa. Pasobra e placa ey bo por inverti den bo mes.
Conoci
Hendenan ta acercando AMAA y ta contento. Ta duna danki tambe na Exprodesk cu ta yudando masha hopi mes y ta facilita AMAA e momentonan cu por tin e contacto cu e grupo cu nan ta traha p’e.
