Sindicato SEPPA ta bezig cu Minister Glenbert Croes riba e asunto di trahadornan di Parke,  pa mira con e cos di e Fundacion y trahadornan  ta bay traha. Awor aki mayoria di e fundacionnan, nan asuntonan ta wordo regla via DRH.

Tin cu tene cuenta cu na momento cu ta cay bao di areglo Subsidiario. Gobierno tin cu regla su placa cu e ta duna e fundacionnan cu e ta subsidia y DRH tin cu controla e parti caminda e hendenan cu supuestamente tin cu haya salario, si e ta cuadra si of no. Tanten cu esey no ta sosode, bo no por duna un hende un salario. Imagina cada fundacion dicidi y kier duna tal salario y gobierno bisa cu e no tin placa. Pesey DRH tey pa controla e cosnan aki, pa wak pa esaki cana segun y conforme e areglo subsidiario cu ta wordo duna na e fundacionnan.

Cambio den nomber di fundacion

Segun Edmundo Marlin, por haci cambio den nomber di fundacion, pasobra ta un fundacion e ta keda. Pero tanten cu e posicion huridico di e trahadonan ta keda regla igual, locual ambtenaar tin, ta DRH tin cu bay handle cu e cosnan aki. Cu bo kier bin cu un PZ apart, tin cu wak con esey ta bay traha. Pesey mes, e momento aki, tur e fundacionnan ta cay bao di un areglo subsidiario y pesey ta atene na esaki cu e minister encarga cu asuntonan social, y pa mira con ta bay atende cu e cos aki pa futuro, pasobra bo mester tin algo caminda trahado ta sinti nan mes confiabel cu locual ta bay bin awor aki, ta miho y no bira pio.

Posicion huridico

Loke ta e problema mas grandi awor aki, ta e posicion huridico di e trahadonan cu tin cu wordo regla. E cos aki ta canando pa hopi aña caba y no por wordo regla. Na cierto momento si no por logra cu e bestuur mes, lo tin cu bay cerca minister pa mustre kico ta andando. Dado momento, un hende tin cu bay tuma un decision. E cosnan aki ta tarda. Pero semper ministernan ta bisa cu e ta djis subsidia, pero ta e fundacion tin cu maneha. Automaticamente ta cay bek cerca e fundacion, cu tin cu tuma e decisionnan.

E final

Marlin a splica cu SEPPA ta handle cu e asunto di e trahadonan aki. Nan ta canando nan caminda y lo sigui cana nan caminda. Door cu tin hopi confusion awor aki, e confusion no a clarea ningun rato. Uno ta e parti di areglo subsidiario unda cu e gobierno anterior kier a bay over pa duna cada fundacion un suma y nan mes maneh’e, caminda a mira e peliger. Ta bezig cu e gobierno actual, pa para e cos aki y yega na algo cu ta mas miho pa e fundacionnan. Bo tin un areglo subsidiario y esey tin cu bay wak con e ta bay traha. Banda di dje, tin e trahadonan cu tin hopi tempo ta wardando pa nan cosnan wordo regla. Esey ta un di e cosnan cu ta molestia e trahadonan. Fuera cu nan no ta hayando oido di gerencia, ta haci e problema bira mas grandi ainda, Marlin a splica.