No tin un parlamentario ni gobernante cu por of no por pa loke ta e refineria. Segun Michael Williams, di grupo di 7, e organisacion ta hopi preocupa y a splica cu e bolo di e refineria ta riba mesa. E bolo no ta di nan. Corta e bolo con cu kier cort’e, si ta bolo kier come. Asina ey Williams a expresa y ta bisa un bes mas. Si gusta, gusta y si no gusta, ta laga. Pasobra cu den oposicion den boca grandi MEP a bisa cu por trece cambio. Cu por miho, cu lo haci miho. Laga pueblo di Aruba hole e cambio, fula e cambio y sa e cambio. Williams ta contra pone BBO 6%. Ta contra tambe tuma medida contra pueblo y djis facil, laga pueblo pag’e, pasobra cu otro a gast’e of lag’i gast’e. Williams no kier tende e escusanan ey.

MEP ta gobierno, pueblo a deposita nan confiansa den nan y nan tin cu haci nan trabao.

Soño di hotel

Ta sinti toch cu tin un hende ta pusha pa otro proyectonan cu no ta refineria, den e caso aki tabata tin soño di hotel. E discusion aki tabata tey caba den tempo di AVP. Un hende tabata contra di e refineria. Awe e ta den gobierno atrobe. Segun Williams, e ta yama nomber y fam y ta p’esey hopi biaha nan no ta gusta. Otmar Oduber a bisa cu e ta kere den hotel pa San Nicolas. No tin nada contra di San Nicolas. Williams a bin di Dakota y ta biba na Santa Cruz. Pero e ta biba na Aruba. Logicamente el a yega di papia cu un meneer cu tabata dirigi nan. John van der Kuyp, dfm. Un homber cu tabata den MEP, un homber hunto cu Don Mansur y Chenko Yarzagaray, a traha un rapport di e bodemonderzoek, cu e desasternan cu refineria a laga atras riba e suelo aki. Esnan cu ta papiando di hotel, ta papiando di negoshi. Ta papiando di haci negoshi cu propiedad di pueblo. Ta esnan cu a biaha bisa cu nan ta bay trece hotel.

Williams a expresa cu na 2001, MEP, Edison Briesen y Nelson Oduber a bisa cu nan ta trece hotel. Hotel a bin? No. Dos biaha gobernantenan di partido MEP a bisa cu hotel ta bin. Nan a duna Morris Neme e tempo ey tereno, ningun hotel a bin. Nan a duna Divi tereno, ningun hotel no a bin. Despues di MEP, a bin atrobe campaña ta un y gobernacion ta otro. Atrobe Minister Otmar Oduber, a priminti cu ta bin hotel. No sa ki dia e hotel ta bin. Sa cu ta un negoshi di tereno. Esey ta loke Williams sa.

Hotel vs Refineria

Williams no ta kere cu hotel y refineria ta bay cu otro. A wordo bisa caba tambe door di Bahia Principe, cu si bin refineria, nan no ta interesa pa bin cu un hotel. Tin di compronde cu nan tin otro hendenan, hasta na Suriname, cu bendemento di tereno di p’ariba, ta pa traha hotel y cu tin di compronde, cu un grupo Venezolano a cumpra un parti di e tereno y esey mester wak si berdaderamente hotel por bin. Ora cu e huma bolter, e hotel lo ta yen di huma. Por puntra e experto riba tereno di refineria, mas bien si berdaderamente hotel ta bay hunto cu refineria.