Ta enfoca riba aumento di entrada, tin recuperacion dje sector turistico y reforma fiscal. Turismo por ta volatil y vulnerabel specialmente den e situacion mundial cu ta bibando.
mr. Xiomara Maduro, Minister di Finansa y Cultura, a splica cu turismo ta e motor di economia di Aruba. Durante pandemia Aruba no por a ricibi turismo y a cay grandemente, pero di otro banda a bons bek fuertemente. Awo ta na 106% compara cu na 2019 y tur esey ta e esfuerso door di tur hende aki na Aruba. Pero tambe esaki ta danki n’e strategia prepara pa asina Aruba por a presenta su mes na mundo.
Esey ta e cosnan cu a tuma luga, e esfuersonan ey y awo ta cosecha di dje. Aruba ta keda un producto importante. Pa loke ta trata impuesto, segun e mandatario, den e trabounan cu nan ta haciendo pa bay dilanti, ta e parti pa tin un finansas publico manehabel. Eynan ta un di e puntonan cu gobierno ta trahando riba dje, cual ta e maneho financiero economico.
Gobierno ta trahando riba un Memorandum Economico Financiero (FEM), cual ta uno mescos cu a traha na comienso. El a referi momento cu nan a asumi e responsabilidad aki na 2018. A traha un FEM y esey ta stipula un caminda pa cana.
Den dje un biaha mas ta trahando uno, pero e no ta cla ainda. Un punto importante den dje ta cu den e sistema di belasting na Aruba n’e momentonan aki tin un lek. Tin un caminda cu Aruba no ta haya algun belasting. Maduro a sigui bisa ta placa genera riba e pais y no ta drenta den caha di gobierno. E lo ta indica den e FEM.
Gobierno a papia cu IMF pa por trece e lek aki y mira kico e ta. Tambe con grandi e buraco ta, unda esaki ta y kico mester haci pa cer’e. E ta den e punto di compliance, pero e realidad ta cu no por keda hisa belasting so y baha gasto so. Den e belasting tambe mester mira si tin e cumplimento necesario.
